Desire 700 Dual Sim 雙卡優遊

近年愈來愈多大廠推出雙卡雙待手機，好似Samsung、Sony等等，可惜大多機款都屬入門型號，機能方面不太講究。HTC剛推出嘅雙卡機Desire 700 Dual Sim（下稱Desire 700）應該係近期嘅好選擇，不但採用四核心處理器及有個5吋大芒，更擁有旗艦機HTC One 嘅靚仔外形、BoomSound靚聲等等，本地用抑或外遊都咁啱使！

$3,298

機面設計十足HTC One，不過屏幕就增至5吋。

機背加入拋光處理，觀感不俗，可惜比較易黏上手指紋。

800萬像素及F2大光圈，規格不俗，用嚟日常Snapshot都夠用。

備有BoomSound喇叭，聲量夠大，播歌一流。

拆開機背殼即可更換兩張SIM卡及記憶卡，方便就手。

電池容量僅得2,100mAh，應該撐唔到一日。

雙網絡管理員可進行簡單SIM卡設定，例如更換SIM卡名稱等。

內置省電功能，手機會自動降低屏幕亮度及CPU耗電，幫你慳電。

備有「塗鴉」App，提供不同筆迹，畫畫記事都啱用。

BlinkFeed主頁依舊可以加入Facebook、Twitter、新聞等不同類型的訊息，一頁睇晒夠方便。

試用《Antutu》跑分，得分唔算好高，幸好用落仍相當順暢。

HTC Zoe拍攝嘅動態相片可以加入特效、邊框，就連美白、大眼都得，好過癮！

看YouTube的《風起了》電影試片，屏幕色水自然，加埋BoomSound立體靚聲，合格有餘！

室內試拍人像，層次分明，不過略嫌雜訊較多。

HTC One倒模靚樣

Desire 700雖然走中檔路線，不過機身設計都可收貨，沿用HTC One嘅幼邊框及修長設計，但就改用尺寸更大嘅5吋屏幕，迎合近年大芒熱潮；而機面上下位置則植入BoomSound雙前置喇叭，聲效由機身兩邊播出，聽歌、睇片時環迴效果特別明顯。翻轉機背，設計反而似另一姊妹機Butterfly S，弧形兼拋光設計，手感不俗，感覺亦相當高貴；美中不足係暫時僅得灰色，襟睇但冇咩驚喜，有埋白色就更加好。

罕有雙卡「雙通」功能

話明叫Dual Sim，當然不得不提其雙卡功能。此機SIM 1、SIM 2分別支援3G、GSM及GSM網絡，兩張SIM卡可以同時待機，狀態欄亦會清晰顯示兩張卡嘅接收狀況；而且更備有雙卡機罕見嘅「雙通」功能，當其中一個號碼通話時，另一個號碼都依然可以接聽電話，亦可以隨時切換通話，保證唔會有Miss Call！為方便用家設定，Desire 700內置「雙網絡管理員」，可設定SIM卡名稱以及優先使用數據嘅SIM卡，非常易用。

四核大芒規格不俗

規格方面，此機搭載1.2GHz四核心處理器和1GB RAM，一般操作及睇片、上網都相當夠用。另外除預載Android 4.1作業系統之餘，亦唔少得招牌嘅Sense 5.0介面，整體功能與HTC One、One Max接近，一版睇晒新聞、Facebook等資訊嘅BlinkFeed主頁；連3秒動態拍攝嘅HTC Zoe以及自製30秒短片嘅Video Highlights短片都有齊，實用、玩味兼備。值得一提的是，新機嘅800萬像素後置鏡頭無論對焦反應、成像都相當唔錯，而且仲備有一個210萬像素、88度超廣角嘅前置鏡頭，十個人一齊自拍都可以影得晒！