ZTE Grand Memo LTE睇戲啱尺寸

支援4G制式近年已成為高階手機的標準規格，不過講到中階及入門的4G手機，市場又確係冇咩好選擇！最近國產品牌ZTE就推出定價三千幾蚊的中階機Grand Memo LTE，齋睇名就知支援4G制式，上網速度夠快；再配合5.7吋巨芒，最啱就係搭車煲劇睇戲。

ZTE Grand Memo LTE $3,298

內置「螢幕助手」，可將機面功能鍵變成虛擬鍵，用法跟iOS的Assistive Touch差不多。

鎖頁上可以設定快捷鍵，可以直接解鎖兼開啟相關App。

「全共享」可以透過DLNA技術將文件、影片、音樂同其他手機分享。

除了設定自動切換3G、4G網絡外，亦可以鎖死4G，於接收不穩定的地方都不怕網絡跳來跳去，影響上網速度。

狀態欄分為兩頁，其中一頁就擺放了快捷鍵，方便開啟常用功能。

備有1,300萬像素鏡頭，並內置HDR、全景、去除背景等拍攝模式。

使用傳統大SIM，用慣microSIM的用家要加卡套。

支援記憶卡，擴充容量、過相、過片都好容易。

機背用上磨沙物料，手感不俗。

播放YouTube的高清影片，顏色自然兼有層次，加上超大屏幕，睇片一流。

試於室內拍攝玩具公仔，雜訊控制幾好，成像亦細緻，連公仔的物料質感都可以清晰顯示。

Grand Memo LTE的5.7吋屏幕尺寸其實同Galaxy Note 3一樣；而且採用IPS素材，顯示色彩頗自然，「味精」不重手。另外，機背喇叭亦支援Dolby音效，睇片時自然更加正！唯一美中不足就係屏幕解像度只得1,280×720，放大網頁時，細字沿邊位置就會有少許模糊，要扣分。

4G加四核

此機另一賣點係支援4G制式，兼容1,800MHz及2,600MHz兩個4G頻譜，即是香港各大台的4G網絡都合用。小記試過於收到4G訊號的情況下，使用《OFCA》App測試下載速度，平均都有接近20Mbps，一般網頁幾秒就Load到，好爽！雖然產品走中階路線，不過規格竟然拍得住不少Android高階機，搭載Qualcomm四核心處理器，時脈達1.5GHz，亦備有2GB RAM，用落相當流暢。

介面有心思

論外形，Grand Memo LTE只屬一般。全黑色配大路圓角機身，其實設計十分普通；比較特別係機背用上磨沙物料，防滑兼手感不錯。反而介面就令人有驚喜，預載Android 4.2作業系統，但換上廠商自家介面，支援九版主頁，就連Widgets都經重新設計，新鮮感十足，另亦加入不少好用新功能，包括鎖頁的圓形快捷鍵Menu、狀態欄的快捷鍵及虛擬功能鍵，十分有誠意。