致力追求創新精神與先進技術嘅Volkswagen，最近將多項數碼技術，包括V-Motion巨型屏幕牆、V-Tunnel智能感應投影走廊、V-Table多觸式屏幕桌、V-Snap超聲波感應平板電腦及V-Window互動櫥窗，帶入全新開幕嘅灣仔旗艦陳列室。依家嚟睇車，除咗圍住部車兜個圈、上車坐一坐，仲可以同部車互動一番，咁前衞嘅買車體驗，相信香港絕無僅有。

大眾汽車香港的財務及資訊科技總監陳國彬（面向鏡頭者），為來賓介紹V-Motion智能式巨型屏幕牆。

大眾汽車集團香港有限公司及大眾汽車香港有限公司董事總經理Thorsten Jaede期望隨住新店開業，打破傳統汽車陳列室嘅框框。

5V科技逐項數
V-Table
除咗用嚟瀏覽各款新車規格，仲介紹埋廠方嘅Think Blue理念。

V-Snap
只需手持平板電腦，走近部車嘅話，就會啟動超聲波感應技術，自動顯示該車款嘅詳細資料。

V-Window
透過互動櫥窗，就算陳列室已經關門，一樣可以睇到新車資料，甚至留電郵都得。

V-Motion
巨型屏幕牆應用咗Swipe Motion技術，以肢體感應動作操控，仲可以同時畀兩人使用。

V-Tunnel
行過投影走廊，當中圖文並茂闡述Volkswagen嘅發展史。

全新旗艦陳列室位於灣仔告士打道，佔地約11,000平方呎，足以同時展出14部車，仲有五大數碼技術，將高科技智能陳列室嘅創新概念帶嚟香港。最矚目者莫過於首次由德國總部引入Swipe Motion技術，將動作感應科技，分別應用喺兩幅分別110"及92"嘅V-Motion巨型屏幕牆；來賓企喺屏幕牆前，毋須直接掂個芒，簡簡單單喺屏幕前面指手畫腳，就可揀到心水車款，即時查看相關型號、車身顏色、車廂設備以至用料等資訊，仲可以瀏覽一切與VW汽車輔助駕駛功能及技術相關嘅影片。睇完V-Motion，仲可以走入V-Tunnel智能感應投影走廊，感覺似足時光隧道，整個系統會自動因應你嘅移動位置，播放品牌嘅發展歷程、經典傳奇車款，以至最新型號及汽車設計，加深大家對品牌嘅認識。

至好玩睇車新招

筆者覺得最Suprise嘅地方，係具備intelligen Digital Vision（iDV）定位及圖像偵測功能嘅V-Snap超聲波感應平板電腦，只要拎住平板電腦，走到任何一部陳列車旁邊，甚至走入車廂內，無論對住車頭、廠徽、輪圈，以至中控台、軚環甚至波棍等隨意影低，預載喺平板電腦內嘅圖像偵測技術，就會即時將呢部分嘅詳細資料及規格展示出嚟，辨識準確度超過95%，筆者即場試過，唔只Work，最Like係簡單易用反應快，估唔到睇車可以咁好玩。

24小時招呼你

玩完一輪，諗住去隔籬嘅休息區Hea番陣先，一邊歎番杯Drink，一邊對住V-Table多觸式展幕桌，點知對眼都係離唔開車，繼續瀏覽各款新車規格，仲有品牌嘅Think Blue環保理念，甚至將店內嘅模型車放喺屏幕下面嘅RFID感應器上一掃，有關嘅型號資料即時Show晒出嚟，連模型車都玩互動，真係估佢唔到。至於V-Window互動櫥窗，就應用咗Touch Foil技術，將櫥窗變成互動觸控屏幕，而且24小時無休，就算陳列室已過營業時間，車迷就算深夜路過，心血來潮都可以透過櫥窗屏幕飽覽多項資訊，若果有事查詢嘅話，仲可以即時利用屏幕發電郵畀VW前線銷售顧問，短時間內就會收到專業回覆，真係快手快腳！

Volkswagen旗艦店資料

地址：灣仔告士打道38號美國萬通大廈地下D及E

營業時間：9:00am-9:00pm（周一至周五）；10:00am-8:00pm（周六、周日及公眾假期）

查詢：3698 9618