恒定F2.8攝戰聖誕 Sony Cyber-Shot RX10

雖然仲有一段日子先到聖誕節，但不少地方已經布置了聖誕裝飾；睇燈飾就梗係要夜晚先夠氣氛，不過環境昏暗影相又未必靚。現在全新的Sony Cyber-Shot RX10就大派用場，皆因鏡頭支援8.3倍變焦及具F2.8恒定光圈，就算Zoom到盡光圈都可保持全開，現場環境唔夠光依然影到璀璨奪目的燈飾。

$9,490

試相
從飾物中的細節可見畫質甚銳利，而使用「普普風」濾鏡，則可把色彩豐富的燈飾顯得更加浪漫璀璨。

RX10內建一吋感光元件，並支援2,020萬像素。

如不想曝光過度，拍攝時開啟斑馬圖案功能，便會將高光位以黑白間紋理顯示。

《PlayMemories Mobile》App可過相和遙控拍攝。

機頂內置的骰的閃光燈，更設有HotShoe位加建閃光燈和收音咪等配件。

144萬點的電子觀景器色彩鮮艷又夠光，望落同實景差別不大。

前方設有對焦模式撥桿，以便調校單張、連續等各種對焦模式。

鏡頭底部有開關來控制光圈環，撥去「Off」即會變成無段式操作。

配有3吋122.9萬像素的多角度屏幕，有助高低角度取景。

用上8.3倍變焦的Carl Zeiss鏡頭，提供光圈環設計，鏡身還有焦距刻度。

備有Wi-Fi功能，手柄位更有NFC接點，手機一拍即連線。

以往俗稱「天涯機」的高倍變焦機身一味鬥長，惟Zoom到過1,000mm時，畫質又未必盡如人意。今次RX10顯然重質不重量，配備一支F2.8恒定光圈的Carl Zeiss鏡頭，提供24~200mm的8.3倍變焦能力，而鏡身更印有焦距刻度，Zoom到幾遠一清二楚。眾所周知，Carl Zeiss鏡頭出名成像力高，就算使用200mm焦距，畫質依然出色，遠處的燈飾Zoom埋去就影到。若然要調整光圈，就要靠鏡身的光圈環，能夠作1/3級修正，而底部更加入了一個開關掣，當撥去「Off」時，光圈環就會變為無段式操作，原來此舉可令拍片時縮放光圈更加Smooth，不過光圈仍以1/3級作放大或縮小。

配備一吋感光元件

可能大家會覺得RX10支鏡仲大過部機，感覺好似妹仔大過主人婆，其實鏡頭之所以巨型，其一是擁有F2.8恒定光圈，其二是RX10內置了1吋大尺寸感光元件，並提供2,020萬像素，配合Carl Zeiss鏡頭解像力幾乎無可挑剔。加上全新的BIONZ X影像處理器的處理速度比以往BIONZ足足快三倍，難怪使用快門先決連拍模式時，可做到每秒十張，更可錄製1,080@50p的全高清影片，而且內置多種濾鏡特效，影相拍攝同樣出眾。另可透過內置的Triluminos技術，將拍攝的影像直接在4K電視上播放。

NFC簡易連線

影完靚靚燈飾，就梗係想即刻Share畀人睇。RX10備有Wi-Fi功能，並植入NFC近場技術，只要用相容的手機一「嘟」即可配對，簡化連線步驟。如用家預先下載《PlayMemories Mobile》App，連線後不單可過相，甚至可以遙控拍攝，想同伴侶影合照就無需再搵人幫手。RX10賣相似單反，其配套又真係同單反有得揮，尤其是有個手感非常好的手柄，凸出的設計方便掌握，而機背配有144萬點電子觀景器，以及3吋122.9萬像素的多角度屏幕；機頂亦有內閃和HotShoe位，配套應有盡有。