
早前日本秋葉原搞咗個Tamashii Nation 2013展覽,展出大量《聖鬥士星矢》嘅新品,可惜能夠親臨其會嘅香港粉絲唔多,大部分人只能夠上網睇圖望梅止渴。唔使失望住,原來近近哋喺新蒲崗,都有星矢嘅足迹出現,事關有商場爆發小宇宙,將大堂布置到成個聖域咁款,加埋唔少難得一見嘅經典珍藏、仲未公開發售嘅聖衣神話EX金牛座阿魯迪巴及水瓶座卡妙、率先亮相嘅港產Kidslogic Q版雙子座撒卡,以及1:1嘅星矢雕像,身為粉絲唔到場朝聖,都幾難瞓得着!

EX大陣仗場景
金牛座阿魯迪巴

水瓶座卡妙

懷舊珍藏
當年迷倒不少80後和90後的「聖衣大系」Figure,必定勾起粉絲好多童年回憶。

屬於非賣品嘅「假人馬」,全球只有500套,有成廿幾年歷史,依家有錢都買唔番。

荒木老師嘅手稿,以及東映動畫配音劇本,絕對係難得一見嘅超級珍藏。

保存完好嘅《星矢》黑膠唱片、卡式帶連兒童公仔書,咪話依家,筆者想當年都未見過。

新品預覽
Kidslogic雙子座撒卡首展之餘,仲可以即場預訂,售價$330。

據大會表示,喺下月嘅指定日子,仲有Cosplayer扮雅典娜同黃金十二宮現身,玩到咁大呀!

展覽期間於商場購物滿$2,500,送你港產ES合金星矢別注配色Figure一個。
港日新品鬥一番
今次展覽名為「《聖鬥士星矢》聖域神話館」,四周以雪白色嘅希臘神殿圓柱布置成動畫中嘅聖域模樣。不經不覺,「聖衣神話EX黃金12宮」只係出剩水瓶座及金牛座,Bandai亦已表明兩者最快都要明年先會開售,勢估唔到除咗益日本自己友,呢兩款EX試辦竟會遠道來港,喺今次展覽現身,聯同其餘多位EX黃金聖鬥士,配合大陣仗嘅場景布置,傳神重現每位角色嘅必殺技,包括阿魯迪巴嘅「巨形號角」,以及卡妙嘅「曙光女神之寬恕」。
喺香港擺Show,本地薑點可以畀Bandai威晒,本土Figure品牌Kidslogic就派出從未曝光嘅雙子座撒卡亮相,原著中獨特嘅雙臉頭盔、見唔到樣嘅「黑面」造型,變身Q版Figure後都依然跟足,配合圖案精緻嘅磁性轉盤發光台座,搶鏡度不遑多讓,而且即場接受預訂,實行Figure我賣先。
經典珍藏回憶滿載
活動焦點唔只有新作參展,場內仲有一間布置成漫天星空嘅密室,展出多項由超級粉絲借出、市面上難得一見嘅經典珍藏,包括初版「聖衣大系」全系列Figure,以及限量五百套、屬於非賣品嘅「假人馬」聖衣連場景,仲有滿載集體回憶嘅《星矢》卡式音樂帶連公仔書、TV版嘅監督荒木伸吾老師嘅手稿,以及東映動畫配音劇本等。至於最有氣勢嘅展品,莫過於放正喺展區中央嘅1:1天馬座星矢雕像,修長嘅身形比例,充滿荒木老師嘅神髓,聖衣部分仲由象牙白改成電鍍銀,更見耀目。一個展覽,已經有晒咁多回憶、咁多Gimmick位,必然成為星矢迷必到嘅「打卡」熱點啦!
《聖鬥士星矢》聖域神話館@Mikiki
日期:即日至明年1月6日
地點:新蒲崗太子道東Mikiki地下中庭
時間:中午12時至晚上10時
查詢:3980 9930
Alfred