Galaxy J 混血靚仔

啲人成日讚混血兒又靚又聰明，原來手機都一樣，好似水貨新返嘅Galaxy J，表面上係一部日系手機，修長機身、閃亮色系；但骨子裏原來係「泡菜國」Samsung出品，四核心CPU、3GB RAM、1,300萬像素規格同旗艦機Galaxy S4睇齊，完美地將日韓兩國手機優點集於一身，哈日迷、哈韓族都值得入手。

修長直身設計加上幼邊框，日系感覺極濃。 $4,980

機背有閃令令效果，而機側邊位都統一用同一顏色。

用到本地SIM卡，3G上網穩定冇問題，可惜仍未支援香港4G制式。

Home鍵一併用上粉紅色，仲加入髮絲紋。a

拍埋Galaxy S4（右）一比，S4明顯較圓渾，Galaxy J則線條較利落，個人較鍾意後者。

前後鏡頭齊拍嘅《Dual Camera》及玩動感連拍嘅《Drama Shot》都有齊。

功能表介面分為上下兩部分，可方便地將Widgets、Apps拉出主頁。

內置六款特色主題，都幾有美感。

支援Multi Windows，可玩多工作業。

如果唔鍾意用Docomo LIVE UX的話，可以轉回TouchWiz或者簡易介面。

使用「8 flick Input」時，長按平假名就會彈出八個其他輸入選項，混合輸入必用。

「Emergency Mode」可大幅減少電池消耗，緊急關頭時就大派用場。

日本手機市場向來都係本土廠商獨大，而好多外國廠商都積極打入日本市場，先前就有台灣HTC為日本當地推出J Butterfly，今次就輪到韓國Samsung。要討好日本用家，外形就最為關鍵，所以Galaxy J特別請來日本設計師操刀，同Galaxy S4一比，會發現機身雖然都係圓角，不過機側邊位全部改用平邊，日系感覺即刻出晒嚟；再加埋換咗個日系到暈嘅配色，例如小記手上的粉紅色（Coral Pink），機身有似足唇彩嘅閃亮Bling Bling效果，女生保證鍾意。

Docomo介面加持

既然係主打日本市場，Galaxy J預設介面就並非Samsung招牌嘅TouchWiz，取而代之係日本機專屬嘅Docomo LIVE UX，支援最多七版主頁，兼有唔少Docomo專屬Apps同Widgets，包括《dmarket》、《Schedule & Memo》等等。比較特別係俗稱AppDrawer嘅功能表介面，除咗㩒功能表Icon外，喺任何主頁由上而下一拉都會彈入功能表介面；畫面會即時分割為上下兩部分，上半顯示Apps、下半就顯示主頁，Apps同Widgets可以直接Drag落相關主頁，唔使左拉右拉，比一般Android介面方便得多！如果大家識日文的話，仲可以要用「8 flick Input」輸入法，長按再拉去相關方向就可以混合輸入平假名、數字及英文字，好就手。

超強硬件配置

硬件係韓國手機嘅強項，Galaxy J當然唔會失禮。此機可以話係同廠Galaxy S4嘅加強版，同樣備有5吋全高清Super AMOLED屏幕，對比度、細緻度都好高；處理器更升級至2.3GHz四核心處理器，再加上3GB RAM，狂開Apps或打機都好流暢。Galaxy S4嘅體感操作此機一樣有，好似掃芒轉歌嘅「S Gesture」、郁頭掃網頁嘅「Smart Scroll」等等，實用又有新鮮感！值得一提，Galaxy J特別引入「Emergency Mode」，開啟模式後屏幕會轉為黑白顯示，介面只保留九樣常用功能，熄芒時更會一併關閉數據、藍芽及Wi-Fi連接，令手機電量消耗比一般情況大幅降低50%，萬一遇上天災都可以「留力」與外界保持聯絡，十分貼合日本市場的需要。