Lumia 1520 巨芒強攝博翻身

自從Nokia被Microsoft收購之後，好多人都擔心這老牌手機會逐漸淡出；勢估唔到愈來愈積極至真！繼九月尾Lumia 1020之後，最近又有新作Lumia 1520登場，依舊玩超強攝力，有2,000萬像素PureView鏡頭及光學防手震等；此外仲植入6吋大芒、四核CPU等熱爆元素，鬥屏幕、鬥相質全不輸蝕，隨時成為Nokia甚至WP8手機的翻身作！

此機有黃、白、黑、紅四色，其中紅色一款稍後時間才有售。 $5,998

設有快門鍵，影相定啲、方便啲。

2,000萬像素鏡頭雖勁，但沒有Xenon閃光燈，僅得雙LED燈，火力似乎冇咁足。

記憶卡及nano SIM卡槽都要用專屬工具先打開，稍嫌不便。

機身採用塑膠物料，其中紅色和黃色是亮身背殼，黑色一款則是磨沙處理。

拍埋5.9吋的HTC One Max（右），6吋芒的Lumia 1520（左）機身更纖巧。

《Nokia Camera》內的環狀介面可以調校曝光值、快門、ISO及白平衡等設定。

《Nokia Refocus》可以調整相片對焦點之餘，仲可以玩「Color Pop」，即只顯示相片一部分的色彩，其餘則變為黑白。

試用《myTV》睇高清劇集，大芒睇片確實正，可惜App內冇得調低畫質，收不到4G訊號隨時Lag機。

《Nokia Storyteller》將相片依位置顯示於地圖上，仲會顯示地點資訊，十分互動。

預載《Microsoft Office》，開啟及編輯Word、Excel不成問題。

內置廣東話語音識別功能，似足Siri咁玩語音控制。

《Data Sense》可以幫你計算數據使用量，唔驚數據爆煲。

6吋FHD系列至大芒

但凡是Nokia高階Lumia機系，都例必採用直板方角設計，Lumia 1520亦然，睇落其實同Lumia 925、Lumia 1020等舊作差唔多，但6吋屏幕就屬系列最大。這個1,920×1,080解像度巨芒，更採用IPS素材以及ClearBlack技術，可視角極闊，黑位可保持實淨、對比度亦佳，上網、煲劇睇得舒服。值得一提，以往WP8 介面最多只可放兩欄動態磚，而此機介面則因芒夠大，故支援第三欄動態磚，主頁可放更多Apps，用落方便得多。

地圖相簿夠過癮

近年Nokia落力研究手機鏡頭，之前已經有PureView 808、Lumia 1020等主打攝影的產品。Lumia 1520雖然不及兩位「前輩」坐擁4,100萬像素鏡頭，不過其2,000萬像素PureView鏡頭都規格夠高，亦支援光學防手震技術，低光下影相冇咁易手震。而全新的《Nokia Camera》軟件就有齊Pro、Smart等拍攝模式，可以自行調校光圈、快門、ISO等設定，專業過不少「傻瓜機」！另一過癮功能就係《Nokia Storyteller》，其實係將相簿同HERE地圖整合，可以將相片的拍攝位置以圓形縮圖顯示於地圖上，亦懂同時顯示相片拍攝地點的相關資訊，玩法都幾特別！

四核心高規格

往日Lumia的規格通常都大幅落後其他陣營的智能手機，今次除用6吋大芒跟上潮流之外，就連處理器都一併升級，採用Note 3、LG G2等Android機王同款的Qualcomm Snapdragon 800四核處理器，時脈高達2.2GHz。坦白講，雙核年代用WP8，換頁、開Apps都已經好流暢，家陣用四核心CPU就連多工切換Apps、運行《Microsoft Office》都更爽，可惜暫時未有大食遊戲可以用盡其機能。