Marvel超級英雄電影彷彿已經成為票房金蛋，繼《鐵甲奇俠3》橫掃全球後，隊友雷神亦再度殺入戲院！喺新一集《雷神奇俠2：黑暗世界》（Thor：The Dark World）之中，雷神唔只換咗新髮型，連戰衣都唔同咗，嫌電影畫面去得太快睇唔清楚？Hot Toys就推出1/6版本，360°任你(目及)，仲用埋包膠技術打造麒麟臂，呈現歷年來最Man嘅雷神Figure！

麒麟臂改為包膠，肌肉線條盡情Show Off。

普通版多咗件黑色大斗篷，披上身成個斯文晒。

由於雙臂同上半身係分件處理，舉臂幅度比之前兩款雷神更加大。

頭雕師由Kojun改為K.A.Kim，為忠於基斯咸士禾夫喺戲中嘅演繹，表情仍然木獨，但係再度提高輪廓神似度。

飾演Loki嘅湯姆．希德勒斯頓（Tom Hiddleston），早前到北京宣傳新戲時，專登舉起HT嘅Loki Figure，睇嚟佢對Figure嘅完成度都好滿意喎！

Marvel超級英雄電影喺內地一樣熱爆，為咗慶祝《雷神2》喺當地上畫，迪士尼影業與Hot Toys及廣州天河城合作，搞咗個電影主題展覽，唔只有HT嘅1/6相關Figure與場景外，仲有高達2m嘅雷神大錘，以及由美國空運而來嘅影服及Loki權杖

喺《復仇者聯盟》之中，雷神與鐵甲奇俠合作無間，現實世界嘅最佳拍檔，就係Marvel同Hot Toys，但凡前者推出嘅英雄電影，後者都總有1/6 Figure幫手造勢，等粉絲睇完戲都仲可以繼續回味。HT唔係首次出雷神，計埋第一集MMS146及《復仇者》嘅MMS175，今次已經Take Three，為隆重其事，仲一口氣推出兩個版本，一個係有衫袖嘅普通版，另一個則係露出雙臂嘅「阿斯嘉輕甲版」，HT仲事先爆料，邪神Loki會緊接推出，Figure迷嘅荷包想聚財都難。

頭雕唔似徐錦江

今集雷神繼續由澳洲型男基斯咸士禾夫（Chris Hemsworth）擔正演出，今次改梳辮子頭，真係難為晒造型師JC.Hong，佢話今次髮型層次複雜咗，當初想過用植髮製作，但係又驚玩家未必接受，最後改用軟膠代替，好彩經過多次改良後，就試辦所見髮型夠晒自然，尤其是額側嗰束頭髮，唔會因為低頭而遮住對眼，個人認為比植髮好睇得多。另一要讚係K.A.Kim刀下嘅頭雕，神似度又再升呢，雖然雷神表情一向木獨，但膚色、皺紋同輪廓都更加像真，英氣盡現，絕對唔似網民二次創作海報中嘅徐錦江！

麒麟臂肌肉賁張

啱啱睇完戲嘅粉絲，應該留意到今次雷神件戰甲又唔同咗，由《復仇者》中比較傾向時代感嘅造型，變番近似古羅馬鬥士嘅復古Feel。HT就以軟膠物料製成，再喺表面加入適量舊化，配合黑金兩色，感覺更Raw、更有戰鬥格。另外，無論普通版或輕甲版嘅手臂都係包膠設計，後者就更加無遮無掩Show晒出嚟，肌肉賁張、青筋盡現，而且接駁上刻意同上半身「分家」，令舉臂動作唔再受局限，唯一擔心係裙甲太長，未必擺到爆地甫士。配件方面，只有四對造型手掌及合金鐵錘，分量寡咗啲，好彩普通版送多件黑色大斗篷，性價比先合理番啲。

零售價︰$1,430

預訂價︰$1,390（只限普通版）

非VIP預訂日期︰即日起（普通版）

Toy Hunters VIP及Secret Base

會員預訂日期︰ 11月6日前（普通版及阿斯嘉輕甲版）

推出日期︰明年第二至三季

網址：www.hottoys.com.hk

facebook專頁：www.facebook.com/hottoyssecretbase

查詢︰ 3722 3988（Secret Base）

＊圖中為試辦款式，與正式推出的版本或有若干分別。