再見無限Plan Data用量要識計

眾所周知，用手機串流睇片、上「面書」、玩WhatsApp統統都佔用數據服務；以前有無限數據就話可以冇節制狂用，但係啱啱一眾大台都齊齊宣布取消無限數據Plan，大部分數據上限設為5GB，用多咗就要額外畀錢。究竟各大台新月費點計？又點先可以慳番啲數據用量呢？就等小記幫大家拆局啦！

常用Apps有幾大食？

呢個500MB，嗰個又5GB，一般用家又點樣揀Plan呢？其實大家可以根據自己嘅上網使用習慣去計算，圍一圍約略知道每月嘅數據用量，自然有個預算去選擇。

入門計法：《數據用量計算機》

完全冇用量概念的話，大可以試用通訊事務管理局辦公室推出嘅《數據用量計算機》。只要根據瀏覽網頁頁數、電郵發送數量等輸入相關數目，跟住電腦就會幫你預測每月嘅數據用量，簡單易用。

網址：http://app1.ofca.gov.hk/apps/dataCal/data.asp

進階計法：

若嫌上述工具數據太粗略，小記就用咗包括《Facebook》、《WhatsApp》等常用Apps來實測計算數據用量，值得參考o架！

高用量：《MyTV》煲劇

《MyTV》App啱啱提供高清畫質，試睇21分鐘嘅《走過浮華大地─亞洲篇》，高清畫質就用咗成170MB，即使校低一級用高畫質都用成101MB；假設一個月睇20集高清劇集，3GB用量走唔甩！

大食程度：5★

《YouTube》睇片

《YouTube》同樣提供HD解像度，睇5分鐘影片已經用咗136MB，不過同一段片改用較低畫質嘅HQ解像度就只係用32MB，HQ慳好多喎！

大食程度：4★

《Facebook》刨Feeds

試用《Facebook》，喺5分鐘入面睇咗超過50條New Feeds，期間仲有上載相片、打卡，用量僅僅為6MB；就算每日睇30分鐘，每個月都係用你1GB。

大食程度：3★

《KKBox》聽歌

模擬大家搭車聽歌，用《KKBox》串流聽五首歌共20分鐘，總共用咗176MB；當你一日聽兩次，一個月可以用到你10GB，相當襟計！

大食程度：5★

低用量：《WhatsApp》狂傾

分別傳送及接收50個文字訊息，再分別上傳及下載十幅圖片，文字訊息所需嘅流量本身唔多，再加上相片會先壓縮後傳出，每幅圖片只有40至80KB；所以狂Send訊息、圖片都只係用咗1.53MB。

大食程度：1★

《LINE》互傳貼紙

唔好誤以為《LINE》成日玩貼紙就會好嘥數據，實測分別傳送、接收50個訊息，而且仲次次加入貼紙都好慳Data，0.93MB埋單！

大食程度：1★

《WeChat》聲音傳訊

《WeChat》最常見就係當對講機咁用，同樣先後傳送及接收兼聽埋50個語音短訊，都只不過用你1.1MB，都係慳家。

大食程度：1★

《Google Maps》搵路

小記用佢搵路搵足5分鐘，又用GPS定位及狂用街景服務，結果用咗15.6MB，用量唔算好高，「路盲」朋友可以放心用。

大食程度：2★

月費計劃變成點？留意封頂收費

溫故知新，話說上年二月，幾間大台因應電訊管理局嘅公平使用政策而調整月費計劃，其中PCCW-HKT、China Mobile就率先加入數據上限，而其他台就依舊維持無限數據月費計劃，用過指定數據上限亦唔會停止數據服務或額外收費，只係會對用家實施流量管理或者調低數據服務速度，用家實際影響不大。但今勻就連其他大台都取消埋無限數據月費計劃，現有已簽約嘅用家不受影響，不過完合約後換新合約或新上台嘅用家都一律要跟新月費計劃。就以3香港為例，撇除通話分鐘，分別提供500MB、1GB、5GB數據月費計劃，要留意一旦數據用到上限的話，用家可以選擇用$10額外買100MB數據，不過就設有$898嘅「封頂」收費，咁就唔驚收到幾千蚊嘅「帳單震撼」。

爆數據點算：SmarTone

數據用量就爆時，SmarTone會用SMS通知，回覆SMS就可以購買額外數據用量。

爆數據點算：China Mobile

$199及$289月費計劃除提供購買額外數據用量外，亦分別設有5GB及10GB的數據用量上限，到達上限後數據服務就會被暫停；用家可經SMS申請額外本地數據用量。

爆數據點算：3香港

可用$10購買100MB數據用量，每月其後數據收費上限為$898。

短評

其實幾個大台嘅月費計劃收費都相差無幾，其中SmarTone月費選擇比較多，不過爆數據之後嘅額外收費就佢最貴。China Mobile嘅月費計劃雖然只係得1GB及5GB兩個選擇，勝在本身月費已經唔貴，再加上只需簽約12個月即可享優惠月費，就抵上加抵。而3香港就提供500MB、1GB、5GB三種月費計劃，類近嘅月費計劃都比SmarTone平啲，當中5GB月費只需$228就搞掂，玩得過。