見農在田 Mazda5上水遊

做香港人，一個禮拜坐底五、六日困喺石屎森林做餐死，睇電視又冇台好揀，難得周日放假可以去郊野抖抖氣，竟然有高官提議為起樓可以連郊野公園都割地喎，係唔係連香港人抖啖新鮮空氣嘅機會都要剝奪先？筆者早前就拍住Mazda5去上水走咗一轉，不過唔係直擊水貨客有幾猖狂，而係去有機農莊感受愈嚟愈矜貴嘅綠色世界。

低重心車體加埋遙控雙電趟門，出入車廂分外方便。

2.0L直四引擎以MZR全鋁合金結構製成，仲導入咗廠方獨有嘅S-VT省油技術。

三幅式軚環用上高級皮革及金屬修飾，賣相幾Grand。

波箱係五前速Activematic型號，蛇形槽位更易操作。

中排中央可以收起，變成打通中、後排嘅行人通道。

輕輕一拉後排椅背嘅小機關，就單手都可以放平椅背。

比手掌仲要大嘅有機芋頭，有機種植分外好味。

橘子蜜及鹹橘子都係園主用自家種植嘅有機橘仔製成。有機橘子蜜賣$68/250ml，有機鹹橘子每樽售$198。

樂活有機農莊佔地約20萬平方呎，種咗多種合時蔬果及香草。

聽阿爺講，想當年香港點只種蔬菜水果，連米都會種，仲要係優質貨，好食過大陸米、甚至泰國米，可惜一切都俱往矣，今次嚟到位於上水長瀝村嘅樂活有機農莊，更覺得要珍惜眼前的一片「綠」。呢塊田地雖然唔算大，但喺香港呢片石屎森林之中，可算係蚊型嘅世外桃源，綠油油嘅有機農地被群山環抱，灌溉水來自長瀝山流落嚟嘅山泉，夠晒清澈，加上有機栽種，種出嚟嘅蔬果分外鮮甜。農莊種咗十幾種合時蔬果及香草，仲有利用自家種植嘅有機橘仔製成嘅橘蜜及鹹橘子出售。揸車前往嘅話，可沿粉嶺公路駛至彩園邨外嘅大迴旋處，選擇往石岡方向嘅出口取道粉錦公路，見到榮昌茶座即時右轉，依住往長瀝村及樂活有機農莊嘅指示牌直行，喺過咗雙魚河不久於村口迴旋處轉入一條碎石路，再穿過一棵大榕樹就到，農莊內有免費泊車服務，相當方便。

環保低耗油

今次同行嘅Mazda5 2.0 Deluxe屬於同系頂級版本，直四MZR引擎導入品牌獨有嘅S-VT可變氣閥正時技術，擁有144ps馬力及18.4kgm扭力。配合加裝AAS主動式轉檔配合系統嘅五前速Activematic+/-自動波箱，平均耗油量可低至15km/L，油費僅$1.1左右。雖則動力輸出未算澎湃，但都足以應付香港嘅路面環境，好似由繁忙嘅粉嶺公路去上水一段，筆者就選用手動加減波模式，期間多次切線爬頭，波箱同引擎都好合拍，轉檔過程順暢又平穩。之後駛入上上落落嘅粉錦公路，改用全自動波模式，AAS就會令波箱自行根據路面斜度及當時筆者嘅駕駛舉動，選用合適波段，例如輕踩煞車腳踏時，系統即時自動拖低一、兩個波檔，令整個慢車動作唔突兀之餘，仲可以減少無謂嘅耗油量。

靈活置物空間

除咗要慳油，稱職嘅郊遊車，仲要舒服及實用性兼備。Mazda5嘅軸距長達2,750mm，唔只中排，就連後排都受惠，後排腿部空間就長達775mm。至於6+1嘅座椅布局，中排中央可按需要開啟或收摺，令Mazda5既可載足七個人，亦可以喺車廂打造Walk Through通道，方便乘客喺中、後排之間走動，細小雜物又可放入中排座墊下嘅儲物格，收藏方便，又唔會影響載客量。若果要載大型行李，又唔使坐足七個人嘅話，只要拉一拉後排椅背嘅小機關，就可以將椅背放平，藉此擴充車尾嘅置物量。配套方面，2.0 Deluxe既有專為中排而設嘅風口位，以及具備Aux-in接頭及對應MP3嘅音響組合外，仲有遙控雙電趟門、自動開關頭燈及雨點感應自動開關水撥等，周全又實用。