秋葉原直擊 UBIDAY 2013 34部PS4搶試《AC4》
剛過去星期日，東京大風大雨兼且凍，一班刺客卻無懼天氣惡劣，齊集秋葉原進行「秘密行動」。背後有何陰謀？原來刺客正是為第二年在秋葉原舉行的UBIDAY而來。這個由Ubisoft舉辦的一日限定遊戲活動焦點所在，是可玩新一集刺客遊戲《Assassin's Creed IV：Black Flag》，現場提供34台PS4試玩，還有官方產品和主題食物發售，以及角色手稿展及聲優分享，節目豐富到唔捨得走！
不少Coser都全身刺客造型到場，氣氛熱鬧。
現場設有34部PS4實機試玩《AC4》，大大話話都要排成大半個鐘先有得玩。
在PS4強勁硬件加持下，水花畫面表現像真。
主角識得在樹幹上行走，可伺機躍下刺殺。
試玩版初段要攀石搵路上叢林，途中繩梯會折斷，驚險萬分。
日版《AC4》限定版會跟埋型仔刺客Figure，雙槍造型好有型。
機迷Resupo話佢玩開Xbox，試玩PS4版《AC4》，操控上有少少唔習慣。他謂去年同今年的UBIDAY都好好氣氛，下年如再搞都會出席。
《AC4》舞台環節請來女優歌手麻生夏子跟日版配音聲優出席，有幾百人圍觀。
《The Crew》雖換上PC試玩，但都吸引到眾多玩家排隊試玩。
《Watch Dogs》只提供實機示範，但玩法破格，都引得唔少機迷留低睇片。
現場花絮
Ubisoft Asia Managing Director Steve Miller表示，由於去年UBIDAY反應良好，今年決定加碼大搞，並希望拓展到其他亞洲地區。
現場出售多款遊戲主題食物，這杯插了黑旗的《AC4》炸雞盛惠550日圓。
今年增設Art Gallery，展出遊戲各代封面及手稿，機迷實Buy。
去年UBIDAY只在秋葉原Belle Salle二樓擺檔，由於反應良好，今年加碼用埋地下一層，在那裏設置主舞台、賣物區及主題食品販賣車，不過主題食品巧立名目者居多，好似炸雞插支黑旗、Kebab加上黑芝蔴汁又話係《AC4》特別版，但勝在價錢唔貴亦美味，難怪生意滔滔不絕。
魔盜王上身 加入新元素
講番正題，《Assassin's Creed》刺客主角造型突出，加上遊戲背景引人入勝，是少有能在日本大受歡迎的外國遊戲，引來唔少Coser以刺客造型撐場。今次第四集故事以18世紀初加勒比海海盜橫行時代做背景，刺客主角是第三集主角的阿爺Edward Kenway，以海盜身份跟聖殿騎士對抗。遊戲系統方面亦加入新元素，例如刺客主角識得潛水，另外使用傳統刺客武器如雙刀之外，亦引入包括火槍在內的18世紀初武器，玩法更豐富。
水花及光源處理像真
現場《Assassin's Creed IV：Black Flag》34個試玩台全都用上PS4，筆者當然即刻搶住試，還玩了兩次。不過試玩片段難度唔低，要在船上出發，從岸邊攀石越過叢林再深入敵方陣地，搵路不易外，仲要正面跟敵軍對抗，勝算極低。當然最有效的方法是潛行暗殺，可以先隱藏在草叢伺機暗殺，或者在樹幹、屋頂或者船上桅杆上等待，伺機躍下撲殺。今次玩家可以用火槍攻擊，不過槍聲就好易驚動其他敵人，而且發動時間慢，實用性一般。值得一提是受惠於PS4高效能硬件，畫面變得更靚，好似藍天白雲及水花效果都做得相當出色，當刺客主角上水後全身仲會滴水，超像真。日本方面因為要夾埋PS4主機推出，要明年2月22日才登場，香港好大機會在12月玩到PS4版本，忍唔住的話，可以先玩下月中推出的PS3及Xbox 360版頂癮。
《The Crew》 橫衝直撞飛車
至於事前聲勢相當浩大的另一焦點作《Watch Dogs》，因為廠方臨時宣布延期推出，結果UBIDAY現場只有即場PS4實機示範，不過刺激的街頭飛車以及Hack入手機網絡搞破壞等招數都掙回唔少分數。至於同場有得試玩的遊戲，就有已在香港推出的《Splinter Cell：Blacklist》、Wii U版《Rayman：Legends》、結他音樂遊戲《Rocksmith 2014》，以及即將會在次世代平台推出的新賽車遊戲《The Crew》。可惜《The Crew》同樣因為製作問題要延至明年第二季推出，現場五個試玩台都只用上PC版本。遊戲係玩鬧市橫衝直撞飛車，光源處理做得幾好，車身會因應情況出現污漬及損毀，現場都有不少參觀者願意花半個鐘等試玩！
推出日期：
香港PS3、Xbox 360版11月14日
香港PS4版待定
日本PS3、Xbox 360版11月28日
日本PS4版2014年2月22日
