鄭融快樂Kick Boxing

當Stephanie讀幼稚園時，鄭爸爸經已教她游水，細細個唔知驚，很快就學識，順理成章一上小學就加入泳隊，之後又玩長跑，間中還參加各種球類活動，看來成長以來一直活在運動的氛圍當中，她說：「我鍾意做運動！因為每次做完都會有好累的感覺，特別舒服！」

為演唱會裝備

縱然參與過不少水陸運動，Stephanie未曾試過刺激又熱血的Kick Boxing，她說：「開頭以為打拳好暴力，所以一直無特別去接觸，直至2年前有同朋友玩過才扭轉觀念，不過沒有Keep住玩。」直至最近，她被樂隊Hardpack和LMF的 「鼓佬」 、網上節目《玩爆你個腎》 的主持KB薰陶，才正式學打拳。Stephanie與KB相識於音樂，卻相熟於Nike Night Run，偶然傾談下，竟成功將Stephanie拉攏加入Kick Boxing行列。KB率先表示：「知道阿融即將開演唱會，建議她早些開始準備自己，因為見過不少藝人臨急抱佛腳，開騷前一個月才狂做Gym或者跑步，如果事前及早準備，無論對練氣或身形，效果都較明顯！」

同伴激發能量

Kick Boxing動作大又講求敏捷度，對練氣和收身都有一定幫助，不過Stephanie指人氣才最重要，她解釋：「細個玩的運動不外乎是跑步和游水，只得自己一個人進行，玩得耐都會覺得悶，反而打拳可以和朋友一齊對打，好玩好多！」有人就有火花，搞鬼的KB當然不會放過任何機會，有時趁Stephanie練拳時，便和其他同伴叫囂打氣。Stephanie笑着說：「他們幾個男人在我身後叫：『Yeah』，無論做甚麼動作他們也不斷叫囂，搞到我不知幾緊張，但有時他們叫多幾次，就真係撻番着團火喎，捱到最辛苦那幾下！」看來二人打拳，特別有效果，運動和苦差再次畫上不等號！

體能遊戲

話說回來，至今玩Kick Boxing依然是男性居多，對女士來說，打拳都是暴力遊戲，Stephanie說：「玩落才知道打拳是一種講求技術性的運動，因為每個對手都不同，而這運動是計分制取勝，即是打到某一點就有分，所以你要思考怎樣可以打倒對方，個腦要Keep住轉，絕對唔係一面倒狂打。」上場對打之前，準備尤其重要，多樣化的Cross Training則成為Stephanie喜愛環節，「Boxing的Cross Training主要訓練體能，連續出拳100下，踢腿100下，即使休息都要在地上做Sit Up，一Part緊接一Part，Non-Stop做不同動作可以推動到我，非常有挑戰性。」

以為有舞蹈底子的Stephanie容易上手，事實卻不然。她說：「跳舞可以幫我擺到Pose，但打拳要求腹部力量要穩！比起其他運動，Kick Boxing對我來說是體能上的鍛煉，訓練鬥志，因為一個動作20下，一個鐘會不停轉其他動作，所以練習時要好專心，尤其是留意反應和呼吸，因為呼吸不平均會影響做動作的耐力同次數，這點我還在學習中。」經過今次Stephanie的分享，看來跑步跑到悶的女性，不妨一試Boxing的樂趣！

專家之言：打拳協調全身

屬於帶氧運動的Kick Boxing，透過練習可增強心肺功能及加速血液循環，而且排汗量多，有助身體帶走廢物，改善水腫問題；加上一小時可消耗800至1,000卡路里，能鍛煉肌肉線條，效果比跑步明顯，健身教練鄭麗莎說：「打拳是全身運動，講求力量和關節配合，全身的肌肉會不規則地使用，包括大量手腳協調動作、腰間發力等，每個動作都能收緊肌肉，不但可以訓練平衡力、反應及敏捷度，更能幫助燃燒脂肪，達致收身減肥的目的。」

繼跑步之後，不少女士視打拳為型格的減肥運動，過程開心又可發洩情緒，Lisa表示女士有明顯的學習優勢，她說：「女性的柔韌度通常比男性大，她們比較注重細節位，動作姿勢做得較正確，細心聆聽和跟教練商量，令她們進步得快。而男性通常以力量為主，會出盡力一拳打落去，反而不太關注動作、姿勢、力向的配合，需要時間重新調節。」

分兩階段鍛煉

反觀Stephanie和KB的訓練，原來不只集中打拳，還要跑步兼健身，對練肌肉、修線條大有幫助，Lisa說：「練習時會分兩個階段，第一階段以Cardio（帶氧運動）為主，通常跑步當熱身，之後打拳加Circus Training，即是Sit-up、Push-up和腹部訓練，可以令卡路里燃燒得快，飲食配合要清淡，多菜少澱粉質；第二階段會集中Muscle Training，透過負重訓練強化肌肉，例如舉啞鈴和器械動作，飲食需比之前更關注，多攝取蛋白質和澱粉質，令身體練出肌肉線條。」

鳴謝：健身教練鄭麗莎 （Lisa）