MusicBand 811 陪跑樂伴
踏入秋冬，長跑賽事陸續開鑼，相信跑手們已密密練！唔少人鍾意邊聽歌邊跑步，冇咁悶咁話；如果你係呢類跑手，i.Tech新出的MusicBand 811藍芽耳機就一定啱你。耳機採用扁線材及掛頸設計，僅重13.2g，帶住佢跑步不是負擔；加上備有6mm釹磁鐵單元，配合apt-X解碼技術，有靚聲相伴，話唔定可以跑勁啲！
專用Android App稍後就會上架，可以於App內設定快捷鍵，其他i.Tech耳機都用得。
仲可以啟動手機拍攝、Facebook簽到等功能，用家亦可以自訂開啟指定程式。
採用USB充電，靠專用電線夾住耳機晶片位置即可。
採用6mm單元，體積雖小，不過音質不俗。
連按兩下「音量+」即可啟動低音模式，連按兩下「音量-」就可以啟動指定功能或程式。
即日起購買MusicBand 811，即送價值$89的「限量增值套裝」，內有保護袋、USB充電線及衣領夾。
MusicBand 811 $599（a）耳機僅重13.2g，掛上頸都唔覺累贅。
Sony NWZ-W274S 防水MP3 $820（b）
Plantronics BackBeat GO 2 LE 超強續航力 $898（c）
LifeProof Nuud機殼 四防保護iPhone $702（d）
除了為駕車人士而設的單聲道耳機外，i.Tech近年不時推出聽歌專用的雙聲道耳機。就好似MusicBand 811，驟眼睇設計確實激似Plantronics的BackBeat GO，同樣採用入耳式及掛頸設計，扁線材上亦備有一個線控，唔會咁易蹺線，佩戴舒服。此耳機配色特別，線材用上名為Passion Red的火紅色，配合銀黑色的入耳式耳機部分，撞色搶眼，襯Sporty Look夠醒神。
apt-X無線靚聲
MusicBand 811支援藍芽4.0技術，連接一般iOS、Android裝置當然冇問題；如果你用Galaxy S4、Xperia Z Ultra等支援apt-X的手機就仲正，皆因耳機亦支援apt-X解碼技術，就算無線傳輸都可以有CD咁靚的音質，質素拍得住有線耳機。另外耳機內置6mm釹磁鐵單元，試聽Pop Music效果相當唔錯；再加上採用防汗水設計，耳膠又帶得穩陣，齋播歌電量都頂到四小時，做Gym、跑步合用。
連按開Apps
潮流興玩Apps，就連藍芽耳機都唔放過，i.Tech同場仲發布咗《i.Tech smart connect》App，除可用App查閱耳機剩餘電量外，用家仲可把耳機「音量-」鍵設定成快捷功能，連按兩下即可操作手機拍攝、Facebook程式簽到或聲音報時，甚至開啟指定程式，都算方便。不過留意此App暫時只會推出Android版本，iOS用家等吓先！
同場加映：運動聽歌必選：Sony NWZ-W274S 防水MP3
設計看似同一般耳機冇分別，查實原來本身已經係一部MP3機，內置8GB容量，經電腦就可以傳輸歌曲。它機身防水，更特設四對游泳專用耳塞，拎去游水當然冇問題。
Plantronics BackBeat GO 2 LE 超強續航力
設計和功能都同BackBeat GO 2一樣，包括P2i軍用級納米防汗技術、14g便攜重量等等，特別在附送便攜充電袋，可為耳機額外提供14.5小時電力；袋上亦有LED電量指示燈，用足大半日都得。
LifeProof Nuud機殼 四防保護iPhone
帶iPhone去做運動的話，LifeProof新出的Nuud iPhone保護殼就最合用。這機殼設計輕巧，具防水、防塵、防雪、防震四重防護功能；最特別是機殼採用無覆蓋屏幕技術，將屏幕邊緣密封，毋須再用物料覆蓋機身屏幕。防護功能方面，既可浸落兩米水深並正常操作達一小時，亦可完全隔絕灰塵、塵土顆粒及冰雪，防護評級更符合IP-68認證。同時，此機殼符合MIL STD 810F-516軍事評級，可承受兩米墮地的衝擊。不過官方表示最新的iPhone 5s及5c則不合用。
查詢：（a）2374 4923、（b）2345 2966、（c）2395 3913、（d）3720 1600
