紅彗星撐場 版聚10周年
正所謂獨樂樂不如眾樂樂，好似睇戲、碌齡、打邊爐，一個人去邊有Mood o架？原來連砌模型都可以Gathering一番！由香港模型聯盟舉辦嘅「版聚」（HKML Fair）不經不覺踏入10周年，新一屆就啱啱喺九龍灣展貿中心舉行，場面有幾熱鬧？入場人數233人、參展作品就有520件，大陣仗之餘，仲有唔少高質素，甚至充滿Gimmick嘅佳作，好似科幻組比賽冠軍嘅1/48紅彗星，不但組裝到塗裝都有高水準，仲會發光、發聲，甚至識郁兼噴煙，點到你唔服？
今屆版聚有唔少萌系作品，包括痛車坦克（左）及鬆弛熊痛車。
科幻模型唔只高達獨沽一味，今屆版聚就另設《裝甲騎兵》（左）及《機甲戰記威龍》兩大攤位。
除咗科幻及軍事類別，今屆版聚仲有唔少生活化嘅作品，例如國泰嘅747（右）及太鼓之達人嘅街機。
今屆版聚嘅入場人數及參展作品數目都破晒紀錄，對模型愛好者而言，當然更加興奮。
Philip（版聚召集人之一）
超記（科幻組冠軍）
William（非科幻組冠軍）
面對面好過面對芒
筆者都係模型友一名，當然唔係高手啦，不過經歷相信都同其他人一樣，都係一個人補筆地、批水口、噴油……整好咗又如何？觀眾就只有唔多識欣賞嘅父母大人，咪話唔孤獨。好彩互聯網嘅出現，終於打破悶局，香港模型聯盟就由此而生，而且唔只搞網上交流，仲可以喺現實世界與眾同樂，正如聯盟搞手之一嘅Philip回憶道：「聯盟網站成立之後，各位版主、網友都覺得與其只係喺網上交流，倒不如約埋出嚟觀摩大家嘅作品，互相交流一番，於是舉辦版聚，我仲記得10年前嘅第1屆，有26個人出席、40件作品，之後愈搞愈大，依家已經去到第14屆。其實呢種面對面嘅交流方式，比起網上世界實在好多，仲可以識到好多朋友，大家互相交流、學習，係搞版驟最開心嘅事。」
即場交流獲益良多
至於今屆版聚就分為展示區及比賽區兩大範疇，前者佔咗九成展品，而且種類繁多，唔只有見慣見熟嘅高達及飛機大炮，仲有兩大特設主題區，分別係《裝甲騎兵》及《機甲戰記威龍》，就連今期喺日本大熱嘅萌系坦克都有，相當多元化。至於比賽區就分為科幻組及非科幻組，科幻組嘅冠軍作品係1/48紅彗星，主體既有高水準嘅軍事化組裝及塗裝，最大特色係內藏LED及摩打，發光之餘，頭部及手腕仲識左右轉動，機身仲會噴煙，底座又會播歌兼播片，邊有得輸？至於非科幻組作品係一個蒙古騎兵，據製作者William表示，模型本身唔難製作，反而資料搜集、考證先係最花工夫，由服飾細節到底座嘅地理環境，都務求做到有根有據，William表示：「呢個Figure屬於持旗手類別，佢所手持嘅旗分有黑、白兩種，白色係祭典用途，黑色就喺打仗所用，我都搵咗好耐資料先知。」透過與唔同作者面對面交流，唔只學到模型製作技術，就連歷史、地理，以至電工知識涉獵得到，眾樂樂果然有意思。除咗期待下年嘅版聚搞得更成功之餘，不如回復舊制一年搞兩次，等各位同好多個機會學嘢嘛！
模型人我有Say
Philip（版聚召集人之一）：「或者玩模型嘅人真係少咗，因為細路仔有太多娛樂選擇，有On-line Game，又有iPad等等，不過我覺得依家嘅模型製作水準提高咗，因為以前砌模型嘅小朋友，包括自己在內，依家都長大了，對自己都有要求，肯花更多錢及心機落去。今次有咁多人參加，我都好意外，一定要多謝背後咁多位版主，以及相關同好鼎力協助先會搞得成。」
超記（科幻組冠軍）：「我去年做咗高達，所以今年決定做埋紅彗星，湊成一對嘛！或者自己有電子經驗啦，所以發光、發聲呢啲Gimmick嘢都唔算好難，至於噴煙效果就係靠底座裏面嘅旅行裝放濕機，比起火車模型點煙油安全得多。至於紅彗星嘅造型就參考之前時代廣場嘅1/3版本，底座加埋芒播Slide，畀參觀者多啲思考空間，唔會淨係得件模型咁死板。」
William（非科幻組冠軍）：「我最初有玩坦克及人像模型，由於本人讀Fine Art關係，後嚟專注玩人像，最鍾意嘅題材係古代嘅遊牧民族。做資料搜集時，除咗上網、睇書，仲會去博物館，不過發現唔少外國博物館嘅中國藏品，比中國嘅博物館仲多。我依家有個構思，就係將以前香港嘅古裝劇，或者武俠小說中嘅人物製成人像模型。」
香港模型聯盟網址：www.hkml.net
