日本Android手機遊戲多籮籮,可惜依家Google Play實行鎖國政策,想玩就要諗辦法「翻牆」。聽落好似好繁複,其實只需一個電郵,就可以申請VPN輕鬆「遊」日。今次就等小記分享一吓下載方法,再推介幾款免費熱門Games,包括《魔族的時間》、《Chain Chronicle》、《THE逃脫遊戲X》,明日返工等車就多嘢玩喇!

VPN辦法簡易
Step by Step
進入「tsunagarumon.com/entry」輸入電郵,完成手續就會收到確認郵件。

收到郵件後Click入連結,不久就會收到VPN帳號及密碼。

在手機設定內新增VPN;伺服器名稱輸入「vpn.tsunagarumon.com」,連線後即可進入日本Google Play。

一見圖鑑就知《魔族的時間》又係玩課金抽卡,要獲得好夥伴可能要大灑金錢。

本作的鬼怪完全唔得人驚,反而走可愛風格,女仔都好啱玩。

《Chain Chronicle》亦有推出合作活動,好似近日就同《光明之刃》Crossover推出新卡。

每個登場角色都加入個性劇情,玩家邊睇邊玩,一定更加投入。

《THE逃脫遊戲X》集逃脫及懸疑兩大題材而成,玩家一定有新鮮感。

不少道具都可以合成,好考觀察力。

睇見傳統黑、白魔道士公仔,立即勾起對《FF》初代的回憶。

官網只有少量畫面,何謂Panel RPG玩法依然是謎。

VPN辦法簡易

整個VPN步驟其實十分簡單,只要去tsunagarumon用電郵申請,再經電話連接,就可以開啟日本Google Play下載遊戲。不過小記建議大家盡量避免下載收費遊戲,因為輸入信用卡資料時,有機會被人截取,有咩損失就唔好啦!

免費熱門日本Games推介:《魔族的時間》(まぞくのじかん)學做見習魔王

本作的iOS版推出短短一個月,下載人次已突破30萬,近日Andriod用家終於有福玩到!玩家將要在作品內扮演見習魔王亞提,率領手下鬼怪同人類來個正面大鬥法。此作力銷可愛萌系角色,每隻鬼怪更加有唔同的得意性格,從而引發連串爆趣、感人劇情;加上玩法融入收集、抽卡元素,自然吸引到大批玩家日日追住玩。

《Chain Chronicle》水彩卡牌大戰

今期最紅日本遊戲一定要數《Chain Chronicle》,08年《戰場女武神》推出,其水彩畫風已成功吸納大量粉絲;今年廠商繼續食住條水,翻用同類畫風,變身成卡牌戰鬥遊戲《Chain Chronicle》。本作玩法糅合塔防元素,玩家需要為唔同職業的夥伴布好陣勢,輪流攻擊敵人,曾經玩過《Plants Vs Zombies》的朋友應該幾順手。

《THE逃脫遊戲X》(THE脫出ゲームX)繼續逃離密室

近年掀起一股真人逃離密室熱潮,《THE脫逃遊戲X》就食正潮流,講述男主角被神秘人捉入實驗室,玩家要盡快搵路走,仲要趁機解開失蹤未婚妻到底是生是死之謎,變身做埋伽俐略!另外玩家又要用心搵道具同線索,先可以順利逃離房間。

矚目巨作將登場

手機遊戲市場潛力巨大,一眾廠商當然虎視眈眈。齋睇今年日本Tokyo Game Show通街力谷手機遊戲,就知下季開始一定陸續有好Game推出,以下一於介紹多兩隻矚目巨作,粉絲們切記留意。

《Pictlogica Final Fantasy》新作登場

《FF》一至五代早被Square Enix在手機、掌機平台上數度翻兜,今次難得有手機新作當然要捧場。本作以點陣圖畫面為主,亦保留召喚獸等傳統遊戲要素,啱晒一眾喜愛懷舊風格的玩家。另外本作會在日本Google Play首先登場,睇來Android終於可以打破iOS版本「多獨佔、更受重視」的局面。

INFO

平台:iOS及Android

費用:免費

《Divine Gate》 唔玩轉珠

GungHo的《Divine Gate》於TGS上公布將與動畫《命運石之門》搞合作,預定本月30日首先在Android平台上市,認真識搞噱頭。至於玩法方面,官方就表示唔再玩轉珠,而係有關原創劇情的Panel RPG;至於何謂Panel RPG?真係要等正式發布先知喇!

INFO

平台:iOS及Android

費用:免費