《NBA 2K14》「大帝」隻手遮天

《NBA 2K》系列多年來大打明星牌，既搵佐敦出山，之後又有魔術手莊遜同小鳥布特，今年又會點？今集《NBA 2K14》搵來當屆MVP「大帝」勒邦占士做卦面人物之餘，仲特別加入「占士模式」，可以扮演占士打足七年江山！萬一唔鍾意占士咪好無癮？其實本作強化了的球員招牌技巧及人工智能，令戰況更緊湊，而且更首次可玩埋歐洲頂級球會，都有新意！

Smart Shot Button可使出不同勁度的入樽或放籃動作。

占士是今年《NBA 2K14》的重心，玩家可以陪佢七年打江山。

今集更易傳出「No Look Pass」，但守方的偷波能力亦會增強。

球星的小動作都做得好神似！

新增了歐洲聯賽球隊，球場上更會掛上歐洲聯賽的廣告牌。

今集有14支歐洲球會球隊，不過唔好問我圖中對戰嘅係邊兩隊。

眾球員的招牌技巧（Signature Skills）會在遊戲畫面左上角顯示，當然如柏加（Tony Parker）等星級球員所擁有的絕招就較多。

早幾年已有米高佐敦，今集都有出場，只係沒有獨立推出佐敦挑戰模式而已。

或者可以咁講，《NBA 2K14》就係占士、占士跟占士。首先，勒邦占士首次當上遊戲封面人物；其次，《NBA 2K14》還會收錄由占士精心挑選的遊戲音樂，例如Jay-Z、Eminem、The Black Keys跟Daft Punk等大牌作品；最後，當然係加入「占士模式」，玩家要扮演占士老哥於未來七年雄霸NBA，可以選擇留效邁阿密熱火，或轉戰另一支NBA球隊領軍，藉一人之力帶領球隊爭逐總冠軍。想要挑戰高難度的話，不妨去奧蘭多魔術或者夏洛特山貓這兩支上屆成績最差的球隊吧！

輕易使出No Look Pass

非占士球迷都唔使失望，雖然球員的仔細度並無太大改進，但動作變化多咗，上籃時有唔同力度的變化。上集已經引進每個球員的強項招式，如擅長搶奪籃板、專射三分波或者速度高之類；今集再將招牌技巧（Signature Skills）強化，而且更會將球員的煞食招數顯示在遊戲畫面左上角，都幾易睇。當然星級球員技巧會比較多，若明知該球員無射三分專長，就唔好用佢轉身射個三分波喇！人工智能亦有所重整，電腦會根據玩家的進攻模式自動調節防守策略，要用屈機招就更難。同時防守系統也強化，防守球員身體碰撞激烈，而且偷波成功率會增高，運球時都係小心為妙。好在今集的「No Look Pass」傳波變得容易咗，更適合發揮多變戰術。

遊戲強調真實感，遊戲內的球員狀態都會對應現實環境，透過動態即時球員名單（Dynamic Living Rosters），如果該球員在現實世界「着火」，遊戲內的能力值將會提升；相反表現低沉或受傷，亦會反映在遊戲之內。