定力自拍王 Casio Exilim ZR1200

自拍已變成一種潮流，何時何地也可以自拍一番，講到自拍功臣，首推必定係Casio的「自拍神器」，不過搶手的「神器」熱炒成風，唔係個個都肯捱炒價，所以廠方特別加推Casio Exilim ZR1200，雖然新機外觀冇「神器」咁獨特，但就用上180反芒以便自拍，再加上五軸防震以及美顏與美白功能，自拍效果一樣掂。

$3,380

試相
使用180度反屏自拍，再配合六級的美顏功能，本身有化妝的模特兒，臉部光滑零瑕疵，而且效果自然不造作。

有賴五軸防震功能，即使在室內環境作一般拍攝，單車的線條依然實淨，而且雜訊相當少，畫質也唔覺粗糙。

將模式轉盤扭去「TL」（Time Lapse）模式，就可以玩到新加入的縮時攝影。

翻起屏幕會見到機背配有一個小腳架，以便座枱或放在平面上自拍。

180度的反芒設計，可避免自拍時對錯位，更提供揮手自拍功能，揮一揮手就會倒數拍攝。

配備12.5倍Zoom鏡頭，而鏡頭外圍還有操作環，能以快門調校拍攝設定。

採用SD記憶卡和專用鋰電池，而電池的電量足夠大家瘋狂自拍約470張相片。

縮時攝影功能的最長間隔時間為30秒，而總時間最長可設定為60分鐘，甚至不設時限。

在Best Shot模式內可選擇女士至愛的美白模式，助你淨白膚色。

新機支援五軸防震功能，仲有得畀你揀防震強度。

美顏美白模式免後製

既然玩得自拍，都想以最靚的一面示人，所以很多女生都會利用軟件執靚個樣放上網，於是ZR1200特別內置美顏模式和美白模式，並各具12級程度任你調校，能夠幫你祛除臉上的瑕疵之餘，還兼備淨白肌膚效果，即使素顏上陣都冇問題，最重要係不需經過任何後製，即可得出理想效果，就算別人質疑有冇執過張相，都可以理直氣壯否認。為了方便用家自拍時對啱位，ZR1200採用3吋180度反屏，背面還配備小腳架方便座枱拍攝，而且具備92萬像素展示清晰畫面，咁當然唔少得招牌的揮手自拍功能，揮一揮手就會自動倒數拍攝，等你有足夠時間擺Pose。

大熱五軸防震加持

相信有唔少人都遇過以下問題，就係手持自拍時隻手唔夠穩定，影出嚟個樣變得唔清唔楚。有見及此，ZR1200引入了大熱的五軸防震，能夠透過五個方位全面修正抖動，若然再配合高速連拍合成，即可提供4.5級的防震效果，就算手持自拍都可以確保影像清晰。其實五軸防震唔單止適合自拍，即使在夜間拍攝，又或者把鏡頭Zoom到最遠，亦有效減低相機的震動，咁就唔怕張相鬆郁矇。除了防震系統外，ZR1200的內部規格一樣強勁，配備了一支24mm廣角的12.5倍Zoom鏡頭，還有1,610萬像素的畫質及EXILIM Engine HS 3處理器，提供最高ISO 3,200的感光度，若然使用高速夜景模式，更可實現相等於ISO 25,600的高感光度。

縮時攝影玩快鏡

ZR1200唔單止自拍了得，仲加入好玩新功能。前陣子颱風「天兔」襲港，有人就耗費兩日時間，影了約八萬張相片，透過縮時攝影（Time Lapse）技巧打造了一段約七分鐘的影片，猶如快鏡的天色變化效果相當震撼。ZR1200亦順應潮流加入縮時攝影功能，並可設定影像的間隔時間為1/10秒至30秒，至於總時間就不限，拍攝後會自動製作為一段縮時影片，要玩節奏明快的日出日落、花朵盛開、人來人往等就更容易。有得玩好似快鏡的縮時攝影，當然有得玩埋慢鏡拍片，ZR1200甚至可錄製每秒1,000格的影片，更支援超慢鏡的播放功能，捕捉如閃電般的高速動態也易如反掌。