SO-04E 初音別注萌爆

有留意開日系手機嘅朋友都知，Docomo不時與動漫跨科製作，近年先後與EVA、One Piece等動漫搞Crossover出手機，令不少動漫迷瘋狂。最近仲將呢股動漫「毒性」推高，皆因同日本爆紅嘅虛擬歌姬初音未來嘅聯乘手機正式登場。由包裝、機身、充電座、耳機配機都轉晒初音嘅招牌清新藍綠色，而且機內仲有大量初音鈴聲同Wallpaper，限量39,000部，作為初音迷嘅你，點可以唔搶呢？

$6,680

連包裝盒都印上初音靚樣，好有心思。

配件都同主機夾番色，襯到絕！

橫放手機落充電座就可以一邊叉電，一邊睇片。

有初音專屬嘅Widgets，比原生靚得多。

有初音把聲做鈴聲，非常過癮！

內置《Miku Download》，大把初音內容畀你下載。

注意！用香港Account下載唔到初音內容，一定要轉做日本帳戶先得。

初音配色

今次呢部初音別注版嘅原型機其實係Sony嘅SO-04E，作為初音嘅專屬型號，配色就最重要，邊框、機背殼都用咗初音招牌嘅藍綠配色，感覺好清新。而且機背冇超Hard Sell地印上初音個靚樣，改為印上初音嘅煞食長髮，熟悉初音嘅粉絲應該一眼就認出！除咗機身，隨機附送嘅充電座、耳機塞、耳機遙控都採用同一款藍綠色，夾埋部手機一齊用就超正！

專屬內容

配色、設計滲出初音氣息，內涵當然都要同步。開機畫面、防水殼提示字句變咗初音做背景，而預載主題嘅主角當然係初音，16款初音和其他主角嘅Wallpaper以及專屬嘅電量、時鐘Widgets當然亦有齊。作為日本最紅嘅虛擬歌姬，梗係唔少得用埋初音把「電音」，內置超過10款Miku音樂，用嚟做來電、提示甚至鬧鐘鈴聲都得，時時刻刻都有初音把聲陪住你。

規格足料

雖然係賣樣嘅Crossover手機，不過機能都唔輸蝕；包括1.5GHz四核心處理器、2GB RAM、1,300萬像素鏡頭以及4.6吋720p芒，用嚟重溫初音演唱會都唔會Lag機。而此機仲內置《Miku Download》App，可以喺入面免費下載其他專屬內容，好似鬧鐘、天氣等Widgets，全部同手機嘅主題襯到絕；惟要留意，必須事先轉做日本Google Play帳戶先下載到，有少少麻煩，不過一眾初音迷應該唔會介意。