ASUS ROG G750JH 睇得又打得

美國空軍王牌戰機F-22，夠辣又有型，難怪電影《變形金剛》裏，狂派「星星叫」要變做F-22來討男生歡心。咁啱得咁蹺，原來ASUS的電競Notebook系列Republic of Gamers（ROG）新作G750JH，機身設計都係向F-22取經！G750JH內涵當然夠Power，配備GeForce GTX 780M頂級GPU，加上行Haswell Core i7處理器及有32GB記憶體，想一機玩盡大食3D遊戲都毫無難度。

ASUS ROG G750JH $24,980

背光全鍵盤方便夜晚不開燈打機。

大面積Touchpad的觸感及靈敏度俱佳。

配備720p高清鏡頭，ASUS聲稱可以用來配搭近期熱爆Leap Motion體感操控，玩小遊戲別有一番樂趣。

有Thunderbolt接口，傳輸速率比USB 3.0快一倍。

背面的雙散熱風扇口除了外形好看，亦是提高散熱效能的保證。

置有Blu-ray RW光碟機，讀寫藍光碟都無問題。

NVIDIA 3D Vision 2眼鏡跟機送上，毋須花錢另購。

用上NVIDIA GeForce GTX 780M高階顯示卡，玩賽車遊戲《GRID 2》時畫面無殘影，車身線條又夠順滑。

自家ROG打機滑鼠的側鍵功能可自行設定；SteelSeries耳機亦戴得舒服，遺憾耳機無咪。

打機Notebook除硬件要勁，外形都要似模以樣。G750JH於是參考了美軍F-22猛禽戰鬥機外形，機身設計以菱角及多邊線條為主，加上突出的後通風式雙風扇位，睇樣都覺得夠晒Man；重點係機背的雙風扇可以快速為處理器及顯示卡散熱，不怕長時間玩遊戲導致過熱Hang機，真係睇得又打得。

硬件強勁　高效散熱

G750JH採用了現時最高端、47W功耗Haswell四核Core i7-4700HQ處理器，可Turbo Boost超頻至3.4GHz；同一個家族有JX、JW及JH型號可揀，分別在於GPU規格，而今次介紹的G750JH正是搭載了目前最高速的Notebook GPU、擁有4GB獨立繪圖記憶體的GeForce GTX 780M，官方稱速度比上一代提升達50%，支援PhysX逼真物理模擬效果、DX11曲面細分技術等，玩賽車Game時，車身線條都加倍順滑像真；再配合32GB DDR3支援，G750JH的硬件配置果真不同凡響。惟此機雖支援RAID 0串連混合硬碟，但實機配置僅為1.5TB SATA硬碟，讀取高質遊戲時速度可能略嫌緩慢。

3D顯示　音效出色

既然G750JH定位高階，ASUS在配件方面當然落足料，方可滿足機迷的需求。除了跟機有自家ROG打機滑鼠，以及由專業電競品牌SteelSeries主理的耳機外，今次G750JH更配合屏幕及GeForce GTX 780M顯卡提供的3D技術，奉上NVIDIA 3D Vision 2眼鏡一副；相較第一代產品，3D Vision 2鏡片面積多出20%及加入了NVIDIA 3D LightBoost技術，令可視畫面更大、亮度提升兩倍，用嚟玩3D遊戲就自然更加舒服。而G750JH本身亦用上SonicMaster認證喇叭，配合MaxxAudio程式，就可以輕易在幾Click之間調校人聲及低音，以配合不同環境，自行設定理想音效。