今時今日玩足球遊戲，主流都係玩《FIFA》。無他，此Game樣樣做得夠真，玩法又多，而且連線對戰做得好。今集《FIFA 14》封面又係美斯，會唔會內涵都同上集差唔多？查實今集重新執過物理引擎同角色動作，各部分都更像真，尤其係「Pure Shot」系列，射門招式加入新動作以及逼真的微細變化，由起腳、接觸皮球到皮球直飛龍門的剎那，同睇電視完全冇分別！

今集由起動、腳腕擺動到觸球等動作，都做得非常逼真和細緻。

今集大幅強化南美球隊陣容，想用巴西明尼路對阿根廷小保加都無問題。

遊戲介面全面更新，揀選每個選項都比以往直接方便。

美斯能力值為94，全遊戲中最高；死敵C朗只有92，排第二。

今集在射球前一刻唔再似《FIFA 13》時窒一窒「飄移」再射，好好多！

控球較易甩腳，因此搶奪身位是今集致勝的關鍵。

引入「Pure Shot」技術，可營造出更加像真的射球動作。

隊友之間走位配合夠人性化，當越位時更識得掉轉頭走，之後再突入。

封面依然係由美斯擔正！

新增多組射門動作

今集遊戲封面人物仍然係美斯，論能力值亦都係佢最高，達94，而佢的宿敵C朗就只有92，某程度而言都算合情合理。不過單講數值無用，實際表現先最重要。上一代《FIFA 13》動作表現已經做得相當唔錯，唯一美中不足之處係起腳時會出現短暫飄移。今次EA Sports就為《FIFA 14》差不多重新做過晒動作及物理系統，令每個物理反應都更似真人。最值得講係引入「Pure Shot」系統，利用新技術模擬射球時微妙的動作變化，如第一時間撞射、頂波時轉向都更合乎現實，亦能夠因應情況使出側身凌空抽射，以及被對手緊迫下失去平衡射門，失驚無神分分鐘可以收死門將。

完全模擬真人反應

筆者試玩過，覺得球賽速度略較《FIFA 13》為快，而且每個球員的參與投入感都較上集來得積極，需要少少時間適應。今集爭身位非常重要，被對方埋身一拍好易失波，所以要盡量避免畀人埋身，或出術頂住對手。而物理系統亦改動不少，如高速轉彎時所跑出的弧形線道會更大，急停轉向時需要更多空間煞停。另一值得講係今集不論大牌定二打六球員都加入職業本能（Pro Instincts），可以模擬出真人的反應，能夠因應當時形勢作出合理預測，可以預早判斷對手會剷波而迴避，或者用手臂格開防守球員爭位；就快完場仍落後的話，更會打甩髀，狂博罰球同博角球。

Xbox 360版名宿陪你玩

早前有傳《FIFA 14》有港甲玩，正式版推出後，謠言不攻自破，不過今集就加強了南美球會陣容，如巴西甲組聯賽、阿根廷甲組聯賽同墨西哥甲組聯賽都落足實名球會，如想玩「細哨」朗拿甸奴，大可選擇操控巴西的明尼路，筆者就操控明尼路以兩球打敗小保加。此外，筆者好Buy上集《FIFA 13》引入的「Ultimate Team」儲卡組隊球玩法，今集「Ultimate Team」進一步強化，既由上集的五個級別增至十個級別，挑戰性大增外，Xbox 360版本仲會加入「Legends」名宿卡牌，有30多位名宿卡畀你抽，當中大部分都係活躍在90年代至千禧年代的球星，如柏金、雲巴士頓等，值得一讚係收錄埋現時變成球賽預測「明燈」比利，唔知佢數值有幾高呢？

INFO

類型：運動

開發：EA Sports

平台：Xbox 360、PS3

推出日期：今天

售價：$449

查詢：2359 7998