galaxy Golden古老變時興
多年前摺機大行其道,人人單手一揚揭蓋開機,不知幾咁瀟灑!不過依家要搵部摺機,基本上剩番日系Feature Phone呢啲古老產物。不過最近韓國抵港的Galaxy Golden定可以滿足一眾摺機迷,此機復刻經典摺機Form Factor,最新奇就係機面同機內都有個3.7吋篤芒,摺埋用又得,揭開按實體數字Keypad亦得,仲採用Android系統;加上機身用上大量電鍍金色作點綴,賣相勁豪氣!
$5,480
合上機身,外面有個3.7吋篤芒,即刻變身成一般Smartphone。
機背有個800萬像素鏡頭,對焦速度一般。
SIM卡、記憶卡槽均置於機側,仲有保護蓋防塵。
耳筒竟然採用microUSB插頭,插口仲要係叉電位,唔方便!
揭開機身都有個3.7吋篤芒,可惜功能鍵、返回鍵都變成Keypad按鍵,操作不時要手指上下兩邊走,略嫌唔夠User-Friendly。
隨機附送兩枚電池以及充電座,不過每枚電池容量得1,820mAh,唔多夠用。
採用Qualcomm雙核心處理器,運行Benchmark得分都唔失禮,用落都好流暢。
內置Easy Mode,主頁Widgets會變到超大,用落方便。
Easy Mode功能表會變成3×3大型圖示,長輩都睇得清晰。
《S Health》可以一次過計算步行距離以及燃燒幾多卡路里,Keep Fit啱用。
黃金配色
Samsung呢幾年靠Galaxy系列大芒Android手機上位,但今次新機竟然唔玩超大篤芒,反而係大家睽違已久的摺機。驟眼睇Galaxy Golden機身幾墜手,摺疊狀態下,體積幾乎等同兩部iPhone 5疊埋,加上重達179g,便攜性實在麻麻。反觀機身配色就值得一讚,機面、機背都用上光面物料,而機側四邊及鉸位就襯上電鍍金色,非常有貴氣。另外,此機支援可拆式電池以及最大64GB microSD記憶卡,續航力及擴充能力都合格;要彈就係耳機竟然採用microUSB接口,萬一耳機壞了就睇怕幾難配得番。
雙芒雙玩法
單靠摺機元素未必夠吸引力,但加埋雙篤芒設計就噱頭十足。Galaxy Golden的機身內外同樣有個3.7吋篤芒,有別於以往摺機外芒淨係顯示時間、來電等基本訊息,而這個外芒可全面支援觸控,亦設有三個輕觸功能鍵,唔揭開主機已經可以當一般Android手機咁用,反應仲好靈敏。揭開機身就更過癮,皆因機內屏幕一樣篤得,下方數字Keypad又大又好按,打字唔怕按錯隔籬掣,單手覆WhatsApp都好爽手。最特別係機面驟眼睇不設聽筒,其實頂部「Samsung」招牌位置內藏聽筒,唔使揭蓋都可以傾電話。
順暢Android系統
外形Old School,不過內涵就跟足潮流;採用Android 4.2作業系統,介面、操作基本上同Galaxy S4等同廠手機一樣,備有最多七版主頁,而且亦有特色功能,好似計算步行距離及燃燒多少卡路里的《S Health》,以及供幾部同廠手機同步聽歌、睇片的《Group Play》。而最實用就要數《Optical Reader》,影住卡片就會認到上面的人名、職位、地址等資料,亦可以直接Save埋落手機電話簿,辨認率仲超高,可惜就只限英文,否則一定再加分。硬件方面,Galaxy Golden採用1.7GHz雙核心處理器以及2GB RAM,規格一般,不過換頁、開Apps都好流暢;加上今次返貨的「KT」版本支援香港4G,下載Apps同上網都肯定夠快。
SPEC
制式:GSM、WCDMA、LTE
處理器:1.7GHz雙核心
記憶體:2GB RAM、內存16GB,支援64GB microSD
屏幕:3.7吋Super AMOLED(480×800解像度)
鏡頭:後置800萬像素、前置190萬像素
電池容量:1,820mAh
對外連接:藍芽、Wi-Fi、NFC、microUSB
作業系統:Android 4.2
尺寸:118×59.5×15.8mm
重量:179g
查詢:2374 0618