As One雙妹嘜試真Wish 1.8 Luxury

時代進步，多咗唔少女仔做車主一族，唔多唔少都會影響到車廠嘅設計方針，例如易操控、易睇位嘅細節設計，令女士駕駛都可以易上手。好似樂壇女子組合As One，四人組員之一嘅陳苑澄（Nata），最近就由學神榮升新牌仔，仲對七人車情有獨鍾，可以載晒成隊姊妹出Show之餘，平時又可以做屋企人嘅柴可夫；至於同屬As One一分子嘅「花花」邱念恩（Elfa），雖然未有牌，但一場好姊妹，今次測試豐田（Toyota）Wish都專登出埋嚟，話以乘客身份畀意見喎！

車價：$289,785起

左右LED尾燈之間以電鍍橫條連接，聊添貴氣。

皮革軚環背後設有轉檔撥片，易用之餘又可增加操控樂趣。

波棍台裝有ECO MODE及SPORT掣，撳個掣就可以切換行車模式。

天窗只係前排專利品，車廂開揚感有待提升。

無論倒車或泊位，中控台嘅七吋輕觸屏幕都會「直播」車尾情況。

中排腳部空間相當寬敞，乘坐感自然分外舒適。

新牌仔Nata話A柱size啱啱好，利用前面嘅三角窗仔，睇位都易啲。

輕拉椅背後面嘅機關，就可以放平後排，即使嬌滴滴的花花都可以單手搞掂。

夠十八歲可以做啲乜？Nata跟大部分人一樣，就係即刻報名學車，啱啱上個月就成為有牌一族，嚟緊仲打算做車主。車款方面，佢就睇中七人車載客量多嘅特點，至於引擎容積就冇太高要求，反而着重易唔易睇位，Nata話：「七人車嘅體積，大多數都有番咁上下，都幾蝦新牌仔。」好彩今次試嘅係Wish，事關佢嘅A柱尺寸唔算粗，駕駛者可以透過A柱後面嘅三角窗仔睇位，而且今次測試嘅係Wish 1.8 Luxury豪華版，車尾裝咗後泊車警示器，又連接咗後泊車鏡頭，無論倒車、泊位，車尾環境即時傳送到中控台嘅七吋輕觸式屏幕上，新牌仔都可以放心晒。

行車模式動靜皆宜

原來Nata啱啱考到牌，已經急不及待借家人部房車，喺屋企附近四圍兜，「我想快啲熟習屋企附近嘅路線，累積多啲路面經驗，快啲幫自己出車嘛。」至於性能方面，Wish又啱唔啱新牌仔？佢嘅2.0L直四Valvematic雙VVT-i引擎都有143ps最大馬力及17.6kgm峰值扭力，又有ECO及自選CVT Sport兩種模式，按咗ECO掣，起步反應及加速都會傾向斯文，載着屋企人四圍去就最適合不過；如果只係一個人兜風，或者載埋As One嘅姊妹遊車河，想疾走一番，大可改用Sport模式，再配合軚環後方嘅加減撥片轉檔，起步反應更加直接，操作起嚟亦相當易上手。至於平均耗油量只係15.9km/L，按目前香港油價計算，油費$1.1/km左右，遊多幾次車河都唔覺肉赤。

Nanoe淨化車廂確醒神

以車主角度而言，Wish應該fit到Nata嘅實際要求，作為乘客又有何評價？花花就大讚車廂空間寬敞，尤其是可以收起後排座椅，車尾夠位擺三個大型旅行篋。除咗玩「摺椅」，其實廠方喺營造空間感方面仲有其他板斧，例如刻意縮細波棍台，令中控台下方多咗空位，用嚟擺鎖匙、碎銀等瑣碎物品，不過花花話仲有改善空間：「車廂係夠大，不過天窗面積仲爭少少，如果大番啲就冇咁侷促。」另一方面，花花話坐住Wish遊車河，感覺好似比其他車舒服，唔通係心理作用？咁又未必，事關Wish嘅車廂裝咗納米離子（Nanoe）空氣淨化技術連花粉過濾器，可以過濾空氣中嘅懸浮粒子、過敏原及細菌，空氣清新咗，坐車都自然醒神啲啦！