買玩具若遇着「Sad貨」，甩色兼爛Marking，表面又有刮花披口，甚至是斷件嘅話，相信各位「大大」一定會嬲爆要求退貨。不過今次Metal Build嘅Gundam Exia Repair就打正招牌賣「爛貨」，事關機體設計跟足《Gundam 00》動畫第一季嘅終局劇情，主角剎那駕駛Gundam Exia跟聯合國軍嘅GN Flag死鬥，雖然剎那險勝，但Gundam Exia就搞到右邊面被削，仲斬甩埋左手，全機損毀嚴重，到第二季開始時，要以斗篷遮斷肢嘅緊急修補形態「Repair」撐場，凸顯一份英雄末路，但寧死不屈嘅凜然氣慨。如今透過Metal Build系列實體化，效果又有冇咁英先？

Metal Build GN-001RE Gundam Exia Repair
建議零售價：$1,399

於動畫第二季登場時充滿神秘感，利用專用台座加少少攝影效果，都可以炮製到神秘嘅出場甫士。

用番前作Metal Build Gundam Exia嘅全合金骨架，關節靈活之餘亦相當撳扭。

膊頭邊緣有明顯嘅崩口，又有污漬及陰影塗裝，甚有模型Feel。

槍劍合一嘅GN Sword變成斷劍形態，塗裝上嘅破損Feel，同主體不遑多讓。

如果大家有買之前嘅Metal Build Gundam Exia，就可以利用今次嘅附加組件，換裝成Gundam Exia Repair II。

下一款Metal Build係Destiny Gundam，將於今年12月推出，建議零售價為￥17,000。

GN Sword嘅劍刃部分可以向後摺疊，露出槍口變成射擊模式。

Gundam Exia Repair以「鐵人式」嘅獨眼，代替被擊毀嘅右眼，至於心口嘅透明綠色護罩亦都加埋裂紋。

跟足動畫機設，冇咗右邊膝甲，足踝嘅圓形透明綠色護罩都飛走埋，演活殘兵形象。

就連專用台座嘅拉花都做埋破損Look，同主體襯到絕。

斗篷以前後兩塊獨立組件合併而成，內有兩組三節式關節連接。

同屬Metal Build系列，今次嘅Gundam Exia Repair，跟前作Gundam Exia相距只有半年，沿用同一骨架及合金支架已係意料中事，勝在關節撳扭又硬淨。

落足心機戰損Look

至於今次標榜嘅戰損Look，坊間大部分意見都給予高度肯定，例如裝甲多處都加咗污漬及陰影塗裝，營造飽受炮火摧殘嘅形象，至於機身上嘅警示標誌，亦都做埋刮花、脫漆等效果，而且唔少裝甲邊位都有披口、磨蝕等加工處理，就連GN Drive嘅心口透明綠色護罩都加上裂紋，爛得夠晒勻循。再者整體造型都忠於故事設定，冇咗右邊膝甲及左面腰甲，GN Sword又崩埋，最精細係右邊面「毀容」後以死對頭「鐵人式」嘅紅眼做替代品，可惜外露組件並非金屬製成，質感始終爭少少。

除咗機體本身成功做到蓉蓉爛爛，用嚟頂替左手嘅軟膠斗篷亦都製作用心，塗裝嘅陰影層次做足漸變Feel，表面又有龜裂紋理，整體質感仲好過MG模型版本，不過留意長期無遮無掩Display嘅話，有機會令軟膠「出油」，故此放入玻璃櫃會穩陣啲。

獨臂斗篷形神俱似

斗篷以前後兩塊獨立件組合而成，與肩位兩組可動關節接駁，可以擺出多角度嘅飄揚效果。此外，Metal Build Gundam Exia Repair嘅另一賣點，就係附有可以組裝成Exia Repair II嘅裝甲組件，包括背部呈開放狀態嘅GN Drive、小腿正面裝甲、肩甲及前臂後面裝甲，不過大前提係大家之前已經買咗Metal Build Gundam Exia，否則得物無所用。

SOTSU．SUNRISE．MBS

查詢：2433 1828（瑞華行）