中秋猛料水貨Moto X 襯色DIY

iPhone 5c聽日「追月」就開售，不過佢個「天賦多彩」嘅設計就似乎唔係好多人Buy；講起多彩，Motorola新作Moto X就令人期待得多，水貨趁中秋佳節火速到港，佢大玩DIY配色，官網上除咗有黑、白兩色外，更加可以選擇「Design Yours」，有18色機背、黑白兩色機面、八色機側按鍵畀你揀，計埋有成252個顏色組合，玩味超濃。水貨今次就返咗兩部，分別係黑面綠底以及白面桃紅底，兼且用上青黃色按鍵，撞色確實幾特別。實物拎上手，機身造功紮實，加上機背呈微弧形，手感唔錯。另外，買機時仲可以一併揀埋Sol Republic入耳式或耳罩式耳機，前者仲有成16種色畀你揀，肯定可以襯番部手機。

暫時水貨返得兩部新機，有興趣嘅朋友可以揀定配色再搵舖頭代訂，大約十日到貨。 $5,980

「motomaker」主頁可以畀你自己揀配色，252個組合任你揀，唔怕同人撞色。

隨機仲有件名為Motorola Skip嘅配件，絨面物料兼內藏磁石，可以夾喺衣領；事實上佢內置NFC晶片，只要事先同手機及Apps配對，以後將手機同配件一掃就解鎖，唔使次次輸入密碼咁麻煩。

機背備有1,000萬像素鏡頭，最方便就係手腕轉兩轉就可以隨時啟動相機，反應都幾靈敏。

內置「Assist」軟件，可以預設駕駛、開會等情景及自動開啟嘅功能；例如手機感應到你揸車時，就會自動開啟免提功能。

可以同時訂埋Sol Republic JAX In-Ear Headphones，共有16種顏色揀，而今次水貨亦會一併送埋。

內置咗Active Notification，手機感應到用家接近手機時，會自動着芒顯示時間及未接電話等資料，仲可以當埋快捷鍵直接進入相關介面。

轉手腕開鏡頭搜尋靠把口

硬件方面，單睇1.7GHz雙核心處理器以及2GB RAM，確實未必鍊得贏今期一眾Android新機，不過實際用落又比預期中順暢，打機、睇片都未見窒機，流暢度不俗。Moto X嘅軟件勁有驚喜，採用Android 4.2.2系統，而且仲引入唔少獨有新功能，好似拎住機轉吓手腕就會啟動鏡頭、熄芒狀態下講「OK Google Now」就會即時開啟語音功能，試玩後發覺功能反應超靈敏，都幾實用！值得一提，今次返貨嘅新機並冇上鎖，不過就唔對應香港4G制式，美中不足；另外就依舊支援「Mo記」招牌Crystal Talk技術，傾電話幾乎冇晒背景雜音，以後搭地鐵煲粥，就唔使鬼咁大聲喇！