延期又延期，《Monster Hunter 4》終於趕及今年TGS前正式推出，相信可以帶動起N3DS主機的銷量！今集「芒亨」除咗利用Wi-Fi對戰，毋須圍埋一齊組隊打怪外，動作表現亦比以往爽快，仲可以拎住劍、斧兩用的「充能斧」怒斬魔物。雖然改動唔太多，但真心Fans都必定會買。值得留意，今次《Monster Hunter 4》亞洲版和日版同步推出，仲可以連線一齊玩！

今集重點魔物是擁有巨大雙翼、謎一樣的「黑蝕龍」哥亞．瑪卡拉。

「充能斧」用法特別，轉到「劍模式」儲氣，再用「斧模式」即可發動特別攻擊。

「鬼蛙」鐵茲卡布拉擁有巨大下顎及後肢，可在斜坡上跳躍追捕獵物。

擅用段差跳躍，可攻擊到魔物的特定部位；如騎上頭頂作出致命一擊，是了結魔物的好辦法。

「操蟲棍」十分輕巧，並且能吸取魔物精華來增強能力。

Capcom在遊戲推出的同一日，會在日本推出「黑蝕龍黑」及「艾路白」同捆版N3DS主機， 售價為$26,000。

「芒亨」又點少得艾路貓呢！在單人模式中，可帶同兩隻艾路貓出征。

使用「操蟲棍」時，可釋放出獵蟲吸取魔物精華提升自己能力。

不少魔物都會放毒，唔小心中招就好麻煩。

《Monster Hunter 4》

亞洲版和日版可連線

《Monster Hunter 4》亞洲版同日版內容有幾唔同？其實係一樣，就連遊戲語言都係日文，之不過亞洲版會送本繁體中文說明書，另外售價應會略比日版平。惟亞洲版遊戲只對應行版N3DS主機，日版機的話，就要買日版遊戲，但好在兩個版本遊戲可以互通連線，未買機的朋友可以諗諗部行版N3DS主機，又或者諗吓「黑蝕龍黑」或「艾路白」兩款遊戲同捆特別版N3DS日版主機。提提大家，今集遊戲可支援Wi-Fi無線執行任務，唔使勞師動眾走到快餐店或咖啡店組隊開戰！

立體攻擊魔物要害

系列作的原有玩法冇乜點變，但角色動作、魔物同武器方面就有所強化，提升遊戲玩味。在動作方面，《Monster Hunter 4》強調立體化攻擊，利用地圖上的高低落差位，疾走飛躍從高處攻擊魔物，只要就啱位，更能夠跳到巨型魔物的頭上使出致命一擊，比在地面亂斬有效得多。今集新魔物中最有霸氣首推擁有巨大雙翼「黑蝕龍」哥亞．瑪卡拉，此外還有擁有巨大下顎及後肢的「鬼蛙」鐵茲卡布拉，以及背部有大型鱗甲並擅用尾部攻擊的「絞蛇龍」卡拉拉阿杰拉，拎唔齊裝備必死，如唔採用勁武器都真係無得打！正常攻擊之外，今集有魔物還會在垂死時噴毒兼進入狂暴狀態，如果玩家唔小心中毒太深，更會喪失復原體力的能耐！

劍、斧兩用「充能斧」

魔物「升呢」，為了平衡番遊戲系統，武器威力亦相應增強。去年東京遊戲展時，Capcom已介紹了其中一樣新武器「操蟲棍」，長棍上附有獵蟲，可在狩獵時吸取魔物精華來強化自己能力；並且可用長棍支撐地面作出段差跳躍攻擊。若要養蟲，就要為獵蟲提供蟲餌，此物可在野外採集或在任務中獲取。至於另外一款新武器「充能斧」亦同樣有趣，這武器係由劍跟盾組合而成，特點是可分拆成「劍模式」同「斧模式」，並且各自擁有多種斬擊方法。一般情況下，多會用攻擊力較強的「斧模式」，不過若要提升武器威力，就要撤換到「劍模式」中攻擊儲氣，再換到「斧模式」發動「屬性解放斬」來大幅提升戰鬥力。雖然要不斷撤換兩個模式有啲煩，不過玩法新鮮都足以補數。

INFO

類型：狩獵動作

開發：Capcom

平台：N3DS

推出日期：9月14日

售價：亞洲版$368、日版約$400

查詢：2359 7998