柏林直擊！ Galaxy Note 3 靚皮包底

兩年前Samsung Galaxy Note徹底改變手機生態，令大芒機有價有市，其後更衍生出新名詞「Phablet」，搞到大家即時「跟Phone」！事隔兩年，其第三代終於喺柏林時間九月四日面世，不但屏幕更大、聲音更出，新S Pen更強化了記事及擷圖能力，配合皮革機背，令操作猶如真正筆記簿咁便利。同場還首發了「錶機」Galaxy Gear，影得又講得，現場人人爭住玩，恍似特務上身！

Note 3及Gear均加入了潮流元素，現場Model便穿上不同時裝以迎合主題。

Note 3初推出時會有黑、白、粉色三種選擇，日後還會追加六隻新色。

售價待定

新S Pen（上）外觀與第二代（下）分別不大，並與機身一樣有黑、白、粉紅三色。

鏡頭及閃光燈變成直倒排列，側邊改用仿皮物料，有助提升手感。

同期還會有金屬Back Cover推出，耐用得來仲勁多色揀。

把S Pen懸浮在屏幕上方再撳掣，就能開啟「Air Command」選擇。

電池有3,200mAh，官方指叉爆後夠用一天。

Note 3（右）機角由圓變方，屏幕比Note 2（左）大，同時顏色更飽滿。

在「Pen Window」下，畫出長方形就能開啟計算機等工具。

「Action Memo」支援快速記事，系統更會自動把內容切換到電話簿或待辦事項內，慳番手打時間。

透過「Scrapbook」，在屏幕畫圈便能把當前畫面Cap下來。

對應新版Multi Windows，視窗間的內容可互相傳送，例如把相簿內的相片直接「扯」到ChatON內，操作猶如電腦視窗。

新功能「My Magazine」會把新聞及社交訊息整合為雜誌頁面，令閱讀更輕鬆。

售價待定
Gear採用1.63吋屏幕，閒置時呈黑底白字，藉此節省電量。

全機只有右邊一個「Home」掣，設計簡約到暈！

輕拍屏幕就能拍攝，若熄埋聲真係偷拍於無形。

收音咪設於錶扣上方，講電話時要把手錶靠近嘴邊。

Galaxy Gear可經Samsung Apps下載程式，並有4GB內存畀大家慢慢用。

S Voice可與手錶進行簡單問答，但測試過後，發現港式英語成日認唔到。

提供黑、白、灰、橙、綠及金六款顏色，保守定潮人都揀到。

業界意見
台灣三立電視財經台記者李宣小姐︰「Gear功能有驚喜，而且用色好搶眼，不過佢個鏡頭實在太方便，好擔心將來被不法之徒利用來偷拍！」

同場加映
同場還發表了新一代Galaxy Note 10.1，內置八核心處理器，屏幕解像度更高達2,560×1,600 WQXGA級數，預計明年推出。

現場花絮
發布會於晚上七時舉行，但五時未到，全球傳媒已把門口擠得水洩不通，可見大家高度期待。

Samsung每年例必搞兩場Unpacked發布會，有一場為Galaxy S，另一場就係Galaxy Note。年初時S4已於紐約發布，今次第二回則在柏林舉行，主角正正就是Note 3。小記準時七點入場，驚覺舉行地點Tempodrom劇院的3,800個座位已幾近爆滿，而伴隨一陣交響樂聲，Note 3與Gear終於登場，當中後者出場時更引來熱烈掌聲。兩機本月25日起便在全球超過140個國家發售，香港都有份，想玩新機就要儲定錢了！

恍如高級筆記簿

名副其實，Note這名堂全因其出色的記事功能，但金屬拼塑膠的機身，形象始終走不出手機固有框框。Note 3最大不同之處，就在於機背加入了仿皮革物料，雖不是真皮，但已令質感提升不少，而且邊緣位縫合得相當細緻，予人有一種高級筆記簿嘅感覺。初步發售時先有黑、白、粉紅三色，另外又有S-View Cover、Flip Wallet等不同款式的機套選擇，論外觀絕對不比玩多色的iPhone 5C輸蝕。屏幕則微升0.2吋至5.7吋，數字上分別不大，但由於採用了幼邊框設計，因此拍埋一比，會發覺「視野」廣闊了許多，最重要是解像度已「升呢」至全高清質素，叉足電又夠玩一日，至啱師奶仔煲劇用。

懸浮開選單

由上代Note 2開始，S Pen已幾乎可以包辦全機大部分操作，現場見第三代的S Pen依然保持極高靈敏度，但就加入埋懸浮選單「Air Command」。用家只要把S Pen懸空在屏幕上方再按掣便能隔空開啟，之後有不同功能選擇，包括可快速寫下便條的「Action Memo」；畫圈就能擷圖的「Scrapbook」；有條理地把筆記儲存的「S Note」；藉手寫文字來搜尋資料的「S Finder」；以及畫出長方形就能開啟計數機、YouTube等不同工具的「Pen Window」等。小記最Like嘅就係「Scrapbook」，輕鬆就能把網頁擷下，之後開番又能追蹤來源，用來做資料搜集真係好幫得手！

首見八核快絕同級

Galaxy Note 3將會提供3G及4G LTE兩個版本，前者採用「4+4」架構，令手機處理器首達八核心設計；而後者則採用Qualcomm 2.3GHz四核處理器，搭配超誇張的3GB RAM，於《AnTuTu》得分高達32,061分，快絕同級！影音方面，1,300萬像素鏡頭唔算亮點，驚喜反而係新增嘅High CRI閃光燈，據說可令色彩失真程度減低，夜晚影相唔怕相片變晒色。另外，一如剛發表的LG G2，Note 3亦可播放24 bit/192KHz無損音樂，並在32GB及64GB內存以外，提供microSD卡槽，唔似G2咁冇得入卡，就算幾多歌都食得晒！

Note 3 SPEC

制式︰GSM四頻、WCDMA、LTE

處理器︰1.9GHz八核心（3G）2.3GHz四核心（4G）

記憶體︰3GB RAM；32、64GB內存；支援microSD

屏幕︰ 5.7吋Super AMOLED（1,920×1,080解像度）

鏡頭︰前置200萬像素後置1,300萬像素

對外連接︰藍芽4.0、microUSB、LTE、42Mbps HSPA+、Wi-Fi、NFC

電池容積︰3,200mAh

作業系統︰Android 4.3

體積︰151.2×79.2×8.3mm

重量︰168g

「錶機」首現 Galaxy Gear

由傳聞到登場，Galaxy Gear都是風頭躉，雖然實物沒有用到彎曲屏幕，但1.63吋Super AMOLED正方形屏幕依然好搶眼，並對應體感操作，例如屏幕朝上一秒就會自動着芒，橫掃錶面可選頁，而有來電時只要把手移至耳邊就能接通，令講電話好似特務咁有型！通話以外，Gear還提供簡訊提示、計步器、S Voice及Voice Memo等功能，而錶帶的Memographer鏡頭更可拍攝190萬像素相片及十秒短片，舉高手就可Snapshot。Gear暫時兼容S3、S4、Note 2及Note 3等手機，叉一次電就能運行25小時以上，出街一日都毋須擔心冇電！