《Grand Theft Auto V》終於會在月中推出，相信好多男士已等到頸都長！今集遊戲規模龐大得驚人，可玩嘅陸地及水底區域面積足足係《Red Dead Redemption》的五倍；而且改玩三人主角，除要分工合作策劃罪案之外，又要即時從三個角色中切換，玩法破格。此外，同期都有好幾隻陽剛味甚重的大作推出，例如《Saints Row IV》、《Diablo III》、《Killzone：Mercenary》以及《The Bureau：XCOM Declassified》。呢個月，一於宅在家，打到手軟！

«Grand Theft Auto V»

今集唔止玩陸地，甚至可以下潛至海底。

搶劫解款車任務中，三位主角都戴上面具掩人耳目，都幾搞笑。

相比《GTA IV》，今集科技進步咗唔少，主角都變晒用疑似「埃瘋」打電話搵朋友同傾買賣。

想睇清楚成個遊戲地圖的風景，控制滑翔降傘在上空兜一圈係好方法，地圖仔細程度認真誇張。

遊戲舞台洛聖都擁有不同地貌，河流、湖泊、軍事基地、海灘、樹林樣樣都有。

Trevor造型非常爛撻撻，有場景佢只着住底褲飲醉酒在沙灘瞓覺；而佢擅長於近距離戰鬥。

今集敵人唔再係黑幫，而係外星人！

武器方器同樣天馬行空，連結他盒激光槍都有。

總統主角可使出超級英雄式的異能，行動方式仲好鬼似「Matrix」！

遊戲可自設主角模樣，唔用雄赳赳大男人，變成性感女角都得！

«Killzone : Mercenary»

以手提遊戲嚟講，《Killzone：Mercenary》畫面表現都做得好有水準；兼且支援八人連線對戰。

«The Bureau : XCOM Declassified»

今次遊戲嘅布陣情況，其實同去年的《XCOM：Enemy Unknown》幾相似。

«Diablo III»

重新設計的家用版操作介面，以方便手掣操作為主。

«Grand Theft Auto V» 三支公食大茶飯

開發《Grand Theft Auto V》嘅Rockstar話今集係佢哋史上開發工程最浩大的遊戲，遊戲虛構城市洛聖都（Los Santos）有城市景、郊外景，甚至有好大面積的海上區域供揸快艇及潛水，還可以用滑翔降傘睇勻全景，可玩區域大過《GTA IV》、《GTA：San Andreas》及《Red Dead Redemption》的總和。而單是其中一位主角Franklin的紋理，已經比《GTA：San Andreas》成隻遊戲加上紋理仲要多！

介紹番洛聖都，佢位於美國西岸，除了有仿荷里活的Vinewood地標的城市景外，城外還有河流、湖泊、軍事基地、海灘、農田、沙漠等地形，有城內居民，又有郊外野生動物，配合24小時日夜循環及完善的天候系統，將開放式世界提高到另一層次。

籌備打劫都要錢

據Rockstar開發人員所講，開發《Grand Theft Auto V》時吸收咗好多前作同《Red Dead Redemption》系列的經驗，因此每部分都做得相當有水準，甚至話飛車系統已經同現時頂尖賽車遊戲不遑多讓，筆者睇過即場飛車示範又覺得佢哋無誇大。今集最有特色是用上平行生活的三位主角擔大旗，包括已退休的銀行大盜Michael、飛車神手Franklin同爛撻撻的前軍機飛行員Trevor，每個角色都有自己的生活圈子，有各自的朋友、敵人、生意夥伴以及嗜好，為咗食大茶飯，於是合作搵真銀。今集遊戲中，「Cash is the King」，金錢好重要，去玩、改車、紋身、買武器，甚至連策劃搶劫任務時都要用錢去籌備！

三人合作隨時切換

三位主角平行生活，當切換主角時，會發現另一位主角雖在原來時間點，但會在洛聖都另一邊廂做緊「有趣的事情」，透過三個主角的視點體驗遊戲中的開放世界。當進行任務時，玩家其實可以揀由一個主角、兩個主角或以三個角色進行，例如在街頭槍戰時，可以先安排其中一名角色上天台制高點用狙擊槍攻擊，或以火箭炮轟落支援的直升機，玩法非常多變！而最過癮係當成功做低差人及搶走解款車之後，仲要將車駛到郊區燒車毀滅證據，然後先有錢分！除咗主線任務之外，《GTA V》還設有過百種小任務及小遊戲，睇怕足以令人廢寢忘餐！

INFO

類型：動作

開發：Rockstar North

平台：PS3、Xbox 360

推出日期：9月17日

售價：$465（a）

«Saints Row IV»惡搞總統打外星人

《Saints Row》系列遊戲舞台同樣設定在以開放式設計的黑幫世界，但就明顯沒有受到太多《GTA》所影響，而且一集比一集玩得癲喪！遊戲第一集講主角從嘍囉上位做大佬，第二集就同各黑幫爭地盤，第三集就已經成為地下市長，到第四集可以進化成點？《Saints Row IV》入面，主角已成為美國總統，而對手更由黑幫「升呢」做外星人！如果仲有下一集的話，真係唔知可以去得幾盡。今集遊戲系統跟第三集時相差不太遠，武器跟載具可以作不同部位升級，當然亦因應遊戲主題，主角原本所乘搭的飛機都升級至外星載具，主角總統先生更能好似超級英雄一樣使出超能力，非常誇張！遊戲當中亦加插不少惡搞內容，甚至有心機的話仲可以用上編輯器自製主角模樣，想創造出變種人總統或者只着住底褲通街走的總統都得o架！

INFO

類型：動作

開發：Deep Silver Volition

平台：PS3、Xbox 360

推出日期：剛推出

售價：約$400（b）

«Killzone : Mercenary»首度攻佔手提機平台

PS Vita主機剛降價至$1,680，對唔少機迷來說應是一大買機誘因。新推出的射擊遊戲《Killzone：Mercenary》都應是跟機首選吧！《Killzone》系列在家用平台上表現出色，今次首度登陸手提機版本，畫面表現亦不輸蝕。玩家在今集中要扮演僱傭兵，可以選擇同ISA或者赫爾蓋士兵一同出戰，完成任務後既能賺錢又可獲老闆賞賜的先進武器！本作當然唔少得網上連線對戰，提供三種玩法的同時，兼可支援八人玩，以手提遊戲來說已屬好高水準。

INFO

類型：射擊

開發：Guerrilla

平台：PS Vita

推出日期：剛推出

售價：$298（c）

«The Bureau : XCOM Declassified»土炮打外星人

打外星人？當然會諗到「XCOM」！不過新作《The Bureau：XCOM Declassified》就唔玩回合制，改成射擊玩法，連帶將成個遊戲背景設定在上世紀60年代的美國，方法都幾土炮，不過勝在感覺新鮮！「XCOM」系列作的外星人種如小矮人Sectoid、變種人Muton等都會再次出場之外，本為CIA探員的主角仲可以隨時切換至「戰術聚集」模式為兩名隊友下達指令，不過要記住今次唔係回合制玩法，落指令時，時間都會在當中流動o架！

INFO

類型：射擊

開發：2K Marin

平台：PS3、Xbox 360

推出日期：剛推出

售價：$399（PS3）、$369（Xbox 360）（a）

«Diablo III»改操作易上手

雖然家用版《Diablo III》遊戲內容跟去年的PC版分別真係唔大，但在細位設計上，都有專為家用版作出的改動，譬如新加入適合手掣按鍵操作的使用者介面及操縱系統，以及會用上動態鏡頭令主角設置於畫面正前方，玩法接近一般家用版ARPG遊戲，好易上手。家用版亦一如PC版提供四級難度挑戰，支援四人離線及連線組隊作戰，共同挑戰最高難度的煉獄。

INFO

類型：角色扮演

開發：Blizzard

平台：PS3、Xbox 360

推出日期：剛推出

售價：$359（b）

查詢：（a）2528 0830（b）2359 7998（c）2341 2356