八月頭先喺紐約登場嘅LG旗艦新手機G2，用上全新嘅機背按設計以及超窄邊5.2吋大芒，令唔少用家相當期待。呢部大作話咁快已經喺韓國開賣，韓版水貨亦眨吓眼抵港，同一時間行貨亦宣布將於月內推出。究竟買韓版定等港版好？兩部機又有冇分別呢？就等小記幫大家拆解一番。

檢閱Detail位港版
機面不設任何實體按鍵，2.65mm左右邊框超窄！

最突出嘅係機背按鍵，用落都幾方便。

3.5mm、microUSB等插口都設於機底。

LG仲會推出多色Flip Cover，唔使打開保護蓋就可以喺窗仔睇到時間等資訊。

功能睇真啲
有招牌QSlide功能，可同時開啟兩個小視窗，仲可以調校透明度及大細。

G2係第一部手機支援192kHz/24bit無損音樂格式，樂迷啱聽！

虛擬鍵可以因為喜好，隨時更換排位。

Guest Mode能預定可供使用的程式，唔驚其他人整亂手機。

檢閱Detail位韓版
可以預設使用GSM及WCDMA制式，記住入Hidden Menu開埋LTE。

支援多條LTE頻譜，香港嘅網絡都啱用。

機面設計同港版一樣，驟眼睇絕對分唔出。

機頂暗藏韓版獨有嘅天線，不過香港用唔着。

背蓋印有網絡商標誌兼拆得開，電池、記憶卡、SIM卡都可以隨時換，論擴充能力，韓版贏晒。

收到香港LTE網絡，撥號時亦識得自動跳落3G，接收正常。

隨機送充電座，喺側面攝舊電落去就得，用法幾特別。

電池容量雖然只有2,610mAh，不過有兩粒電補數。

Pantech Vega A880

Samsung Galaxy S4 LTE Advanced

實用背鍵

韓國手機大部分旗艦型號都會喺香港推出行貨，LG G2亦不例外。不過今勻最特別係G2原來分韓版同國際版，而香港引入嘅係國際版。驟眼睇，港版、韓版外形基本上一樣，機面同樣採用5.2吋全高清IPS屏幕，望落色水靚又清晰，質素極高。再擰轉機背，1,300萬像素鏡頭下面加入咗+/-Volume以及Power共三枚實體按鍵，初用時的確有啲唔習慣，但用落就會發現單手玩機時可以輕鬆用食指校大細Volume以及按Power，拍攝時仲可以將「Volume-」當快門鍵，非常就手。

韓版可換電

兩機外觀睇落分別唔大，其實設計卻大相逕庭。港版採用一體成型設計，冇得換電，幸好內置3,000mAh電池，電池更用上SiO+技術，廠商話電量可以更持久；惟不設記憶卡槽，16GB或者32GB版本都未必夠用！韓版方面，背殼可以隨時拆開，亦支援最大64GB microSD，加埋原本嘅32GB內存，擺幾多首192kHz/24bit無損音樂慢慢煲都冇問題！雖然電池容量降至2,610mAh，但隨機送多粒後備電及充電座補數，計續航力都唔會輸蝕。

兩版規格睇齊

規格方面，兩機均採用2.26GHz四核心處理器，配合2GB RAM，講規格可以話係手機界最強，開Apps、玩多工都冇窒機。而以往買韓版手機，最擔心係4G網絡兼容問題，今次呢部韓版G2就解決埋，同時支援1,800MHz及2,600MHz頻譜，香港咩台都啱用。再睇軟件，港、韓版都預載Android 4.2作業系統，亦備有繁體中文介面以及輸入法，操作同出一轍。不過要留意，好似今次測試嘅LG U+網絡商版本，就內置咗唔少香港用唔着嘅網絡商專用Apps；另由於韓版機預設地為韓國，所以每次撥號前會彈出Menu詢問撥號目的地，稍嫌不便。

SPEC

制式：GSM、WCDMA、LTE

處理器：Qualcomm 2.26GHz四核心

記憶體：2GB RAM、16GB/32GB內存

屏幕：5.2吋IPS（1,920×1,080解像度）

鏡頭：前置210萬像素、後置1,300萬像素

對外連接：藍芽、microUSB、Wi-Fi

作業系統：Android 4.2

體積：138.5×70.9×9.1mm

韓版手機小知識

以往水貨手機多數來自日本，而近年韓國手機都多咗人留意，有時韓版機能會強過同款嘅行貨版，又或者隨機配件更多，例如雙電及充電座套裝，加上一般來說水貨機價平啲，所以都吸引到唔少粉絲。值得一提，一般韓國手機都會推出網絡商專屬版本，常見就有KT、SK Telcom以及LG U+三大網絡商，當中KT（K版）、SK Telcom（S版）就比較多人搵，因為支援1,800MHz頻譜，香港部分4G網絡啱用；不過近期多部新機款如LG G2、VEGA A880都支援2,600MHz頻譜，4G兼容再不成問題。

Samsung Galaxy S4 LTE Advanced變色換U

Galaxy S4嘅升級版，外形冇變，勝在有港版冇嘅紅、藍兩色。佢特別支援LTE Advanced網絡，最高下載速度可以達到150Mbps，可惜香港未有相關技術，不過依然支援1,800MHz頻譜，即係部分本地4G網絡仍然適用。而最受用家歡迎就係其Qualcomm Snapdragon 800四核心處理器，時脈達2.3GHz，效能比行版勁得多。

Pantech Vega A880捽得機背

韓國品牌Pantech機款同功能不時有驚喜；好似呢部A880就有5.6吋全高清芒，同G2一樣有粒按鍵喺機背。呢粒名為「V-touch」嘅按鍵，可以當電腦Mouse咁上下左右咁捽，而且仲對應勁多功能，好似捽左右換頁，捽上下校音量、撳一吓就返主頁，影相仲可以當埋快門用添！本身按鍵仲係指紋識別器，一掃就可以解鎖，超實用！

查詢：（a）3543 7777、（b）2374 0618