除咗鐵甲萬能俠，三一萬能俠都係「超合金」以至「超合金魂」嘅常客，不過唔經唔覺「SR超合金」都出咗三年有多，仲未見三一萬能俠嘅蹤影喎？稍安毋躁，今個月終於有聲氣，仲係殺氣騰騰嘅「真．三一」1號機版本，唔只誇張嘅身形比例充滿動畫神髓，加埋把仲高過一號機嘅珍寶級大鐮刀，氣勢一時無兩，將原著中遇神殺神、遇佛殺佛嘅狂絕形象表露無遺。

SR超合金《真．Getter Robot：世界最後之日》Shin Getter-1 建議零售價：￥6,800

Getter Beam以肚皮換件呈現，多得胸、腰、腹三組都獨立可動，令肢體造型充滿力量感。

SR魔神皇帝將會緊接真．三一之後於11月推出，粉絲記得儲定錢，跟真．三一1號機湊成一對「機戰最強」。

同樣來自《真．Getter Robot：世界最後之日》嘅黑三一1號機，千值練將於12月推出，留意布製斗篷內藏鐵線，可以擺出飄逸甫士。

巨型膊頭有延伸機關之餘，手肘亦有額外關節，追加屈臂幅度。

小腿及胸甲嘅綠色位，用透明組件表達，比起傳統塗裝手法更有Cyber Feel。

膝蓋背後設有活掩，屈腿時就唔會頂住，影響活動幅度。

隨盒配件只有大鐮刀、Getter Beam及幾款造型手掌，但係冇咗1號機專用嘅斧頭，唔通要等魂Shop出限定Boxset？

四肢發達 身手靈活

SR真．三一造型出自1998年嘅動畫《真．Getter Robot：世界最後之日》，當中嘅1號機造型粗獷豪邁，四肢比例仲粗過身軀，相比之下，頭部零舍袖珍，要將佢化為實體，相信大家都會擔心象腳咁粗嘅膊頭、小腿會唔會頂住關節位，影響可動幅度？SR超合金就用咗唔少機關設計解決問題，例如膝蓋背後設有活掩，令小腿可以完全屈到掂大髀；至於金色圓框嘅Ball Joint手肘新增額外關節，可以做到舉臂及肩嘅大幅度動作；巨型膊頭內藏延伸機關，令上臂可以拉近胸前，藉此做到雙手高舉大鐮刀嘅大動作甫士。

欠特效Parts 絕招得個樣

除咗大鐮刀，1號機嘅必殺技仲有Getter Beam，喺胸口對落位置放死光，SR版本就以更換肚皮外殼呈現，喺造型美與可玩性方面都算平衡得到，可惜冇特效組件Support，令甫士徒具虛形。另一方面，機體嘅胸、腰、腹三個部分都有可動設計，腹背又有活掩，可以擺到屈腹或挺胸等姿勢，加埋頭部獨特嘅S形關節，能夠大幅度抬頭或者垂頭，擺甫士就有更大發揮空間。再者今次嘅「含金量」交足貨，胸甲及小腿外殼，以至四肢嘅受力關節都以Die-cast製成，相當墜手，咁先至係名副其實嘅超合金嘛！

1998 GO NAGAI-KEN ISHIKAWA/DYNAMIC PLANNING INC., BANDAIVISUAL CO.,LTD MARUBENI CORPORATION-AYERS CO.,LTD

1998 GO NAGAI-KEN ISHIKAWA/DYNAMIC-BANDAIVISUAL-MARUBENI-AYERS

1998 DYN-B.V.-M.C.-AY

查詢：2433 1828（瑞華行）