每逢提起火紅色汽車，第一時間淨係諗起Ferrari或者Alfa Romeo？咪咁out啦，今期嘅最紅代表係MS-186H-CA呀！乜傢伙？未聽過？你冇玩facebook咩？唔少人呢幾日都因為呢架車被洗版喎！畀多少少貼士你估，相傳佢係太空殖民衞星Side-3嘅高科技產品，仲有人估佢嘅速度及機動性係普通型號嘅三倍，車頂仲有角呢……講到咁白，就算車名噏到口唇邊、一時唔記得，你都知我想講嘅，就係「紅彗星」馬沙嘅專用Auris啦！

馬沙揸MS有幾勁，係人都知，但揸車又在唔在行？有關方面炮製咗馬沙試Auris嘅動畫短片，睇見佢由渣古飛落嚟再施施然上車，跟住瀟灑利落劈個靚彎，真係型到冇朋友，想睇嘅話可到netz.jp/char-auris/瀏覽。

唔只換晒gimmick細節，就連頭泵把造型都惡過人，果然有紅彗星風範。

車廂裝潢亦都換咗好多自護軍嘅特色細節，置身其中，似揸MS多過揸車。

中控台面板左邊加咗燈號，最過癮當然係渣古嘅獨眼look。

中控台面板導航都換埋馬沙專用程式，仲搵埋馬沙嘅配音員池田秀一配音，夠認真！

要數車身最貼題嘅改動，筆者首選角形天線。

車身拉花似足模型水貼，高達迷見到唔like就假！

A12係馬沙專用MS常見嘅標示數字，馬沙專用Auris又點少得？

其實汽車與動漫界crossover，喺日本已經興咗好耐，痛車文化就係其中之一，不過大多數屬於車迷自行customize，或者基於特別嘅宣傳活動而設，用嚟display甚至落場比賽都有，但就極少公開發售。今次呢部馬沙專用Auris—Auris Char's Customize，特別之處係由豐田（Toyota）與Bandai旗下嘅創通（Sotsu）合作炮製，攞正license之餘，仲已經喺日本本土接受訂購，限量900部，預計10月1日交車。至於MS-186H-CA就係呢部車嘅型號，MS代表機動戰士（Mobile Suit），186H係呢部車嘅廠方內部編號，CA就係馬沙上校嘅名字縮寫（Char Aznable）；為咗加強高達迷嘅代入感，豐田仲專登開發咗個虛擬品牌Zeonictoyota，顧名思義將自護企業（Zeonic）與豐田結合起嚟，豐田廠房遍及全球就係人都知，唔通佢哋已經喺自護公國嘅殖民衞星Side-3擴張業務？

車主變身MS機師

講番正題，馬沙專用Auris嘅特色所在，唔只車身顏色用咗代表「紅彗星」嘅火紅色，而且車身內外多個細節，都換上代表馬沙或自護軍嘅gimmick設計。例如鬼面罩中央及車尾嘅廠徽，加埋引擎起動掣、波棍頭及車匙，都變成自護軍logo，仲有車尾頂部嘅天線造型，參考咗渣古MS-06S頭頂嗰隻角，入形入格。更抵死係中控台面板都追加埋「馬沙專用導航系統」（NSZT-W62G），雖則用途同一般導航應該唔會有咩分別（唔通引導你飛上太空打高達咩），但係指示上就充滿動畫元素，仲有面板左邊追加嘅燈位，唔只會着圓燈，扮晒渣古嘅獨眼look外，亦會着起馬沙專用logo及「Thruster Ready」字樣嘅燈號，令各位Kidult代入其中，幻想自己揸緊嘅唔係Auris，而係紅彗星專用渣古，諗起都興奮！筆者覺得最過癮係廠方仲設計埋全車拉花，款式跟足渣古模型，唔只有齊Zeonictoyota、MS-186H-CA及馬沙個人徽號，仲有Rescue箭嘴、Achtung Hot Air Exhaust及Armor Lock等標貼，代入感又再double up！

性能規格跟番原裝

雖然馬沙嘅專用渣古，比一般量產型渣古快三倍，不過唔代表MS-186H-CA都會快過原裝Auris，事關兩者嘅機械結構一模一樣，唔同嘅只係車身內外裝潢。呢款特別版以1.8L六前速手波版為基礎，配置2ZR-FAE 1,797c.c.直四引擎，馬力及扭力數值分別為144ps/6,200rpm及18.4kgm/3,800rpm，平均耗油量為14.4km/L，性能表現中規中矩。至於車價方面，基本車價（￥2,250,000）加上一身專用版嘅RS "S" Package（￥1,056,825），合共￥3,306,825，折合約HK$261,240。可惜此車限量只有900部，只供日本本土發售，加上本地代理嘅穩陣作風，相信行貨輸港嘅機會微乎其微，想睇實物嘅話，睇怕要去日本走一趟。

創通˙サソライズ

網址：http://www.modellista.co.jp/product/auris/concept/index.html