Vega A880靈活捽住用

大芒手機愈出愈多，雖然畫面靚咗，但操作就愈來愈唔方便，成日要雙手拎住，超麻煩！韓國水貨機Pantech Vega A880就於機背加入「V-touch」按鍵，單手拎機時用食指捽一捽就能包辦系統大部分操作，上網、開Apps直頭似用Mouse咁方便！

$5,480
採用圓渾白色機身，簡約設計甚有日系機風格。

機背有格仔暗花，並提供1,300萬像素鏡頭及補光燈。

試播《狂舞派》Trailer，A880（下）觀感比iPhone 5（上）好很多，而且顏色較自然，長望更舒服。

電池容積有3,100mAh，而且跟機送兩枚，唔怕用用吓冇電。

「V-touch」按鍵既是指紋識別器，也可用於上網及影相。

厚10.5mm，講真唔算薄，幸好機背微曲，有助改善手感。

每項「V-touch」操作都有詳細教學，保證一學即會。

「T-Mode」把主要功能放晒落一版，操作猶如舊式手機般易用。

預載多個大型Widgets，把時間、天氣及相簿等整合為一。

開啟指紋識別器，先要進行四次指紋登記。

此機另一賣點是支援1,800MHz及2,600MHz兩條香港4G LTE頻譜，用《OFCA》測試上下載速度更相當對辦。

《V Note》程式可寫字畫圖，但機身冇配備筆就唔多方便。

簡約路線

近年嘅水貨市場，Pantech手機同Samsung、LG等對手一樣咁好賣，這除因為它們每次都會搞新花臣之餘，外形靚仔亦是主因。今次呢部A880就有個5.6吋全高清大屏幕，並內置隱藏輕觸式按鍵及格仔花紋機背，配合黑、白雙色，簡約到猶如日系機一樣，日韓女Fans肯定冧爆！屏幕除咗大，還採用了Natural IPS Pro技術，先天清晰度和黑位層次已比TFT好得多，而且顏色自然兼味精唔多，長時間煲劇雙眼都冇咁攰！

Benchmark拍住GS4

Pantech並非首度喺機背加入觸控功能，上次部Vega No.6就有大大塊Trackpad畀大家捽，今次A880就將觸控面縮細為一粒「V-touch」按鍵，並對應不同手指動作，例如按一按可回到Home Screen，左右捽撥頁，上下捽調校音量，上網及影相時更分別可當作Mouse及快門掣使用，單手操控都極靈活。最意外是它還可當作指紋識別器，可用來解鎖或開啟「Secret Mode」，把部分程式隱藏起來，避免其他人使用。

韓國手機出名硬件超班，A880亦相當唔嘢小，採用的是Qualcomm Snapdragon 800 2.3GHz四核心處理器，並且對應2GB RAM及Android 4.2.2系統，Benchmark跑分成績跟機王Samsung GS4相若，難怪試播《狂舞派》高清試片時一啲都唔窒！介面係自家設計，不但Wallpaper、撥頁效果及Widgets比公版選擇多，還預載了一個超簡約的「T-Mode」模式，將撥號、短訊、時鐘等功能整合到同一介面，簡化操作，連老人家都識用！