魔神三度回歸 Robot魂龍星丸

機械人唔一定要幾十層樓咁高、兇神惡煞又周身機槍大炮先叫型，1988年喺日本首播（香港就喺90年）嘅《魔神英雄傳》系列，就打破日系機械人嘅傳統，以Q版造型開創新潮流，唔少80後從此對「魔神系」機種情根深種，對龍神丸等大頭身細嘅主角機念念不忘。Robot魂啱啱出埋黃金龍上身嘅龍星丸，以超帥氣造型，繼龍神丸及龍玉丸之後，再召回大家嘅當年情意結。

Robot魂《魔神英雄傳2》龍星丸建議零售價：$609

面相雕工以至上色都準確無誤，如果雙目改用透明物料，就可增加通透效果。

膊頭上嘅紅、金雙色，都用咗充滿金屬感嘅塗裝，分外搶鏡。

腳掌用咗珍珠白塗裝，比純白色更見貴氣。

龍頸既可扭動，龍口又可開合，可動性交足貨。

龍星丸嘅飛雲Figure（右），比起龍王丸（左）嗰款，造型以至塗裝都複雜咗。

只需簡單步驟就可變成黃金龍，造型亦夠晒英！

全盒Boxset就只有光龍劍一件武器，削咗啲喎，筆者借用同系龍王丸嘅劍風特效組件，氣勢即時Double Up！

可動性高，加上造型比例唯美咗，擺咩甫士都咁有型。

未計外傳及OVA，魔神三部曲—《魔神英雄傳》、《魔神英雄傳2》及《超魔神英雄傳》都喺香港電視台播過，不過後者實屬爛尾之作，能夠打動人心者，始終都係《魔神》及《魔神2》，至於人氣最高嘅機體，亦係《魔神》嘅龍神丸及龍王丸，以及《魔神2》嘅龍星丸。

造型比例更唯美

龍神丸及龍王丸嘅造型可謂一脈相承，龍星丸就破格得多，除咗顏色變成金×紅，仲有頭部嘅雙角由額頭移向耳後，成個Look當堂唔同晒。最新上架嘅Robot魂龍星丸，保持原著嘅大頭仔神髓外，整體造型比例都唯美咗，好似膊頭、膝頭及腳掌都拉長咗，將動畫中嘅帥氣Look，完完全全立體化起嚟。至於塗裝方面，紅色位用咗金屬化塗裝，至於白色位就用珍珠色，理應可以增加貴氣，不過筆者稍嫌主色唔夠「金」，感覺上都係偏黃咗，好彩未至泥黃，所以整體而言都算夾得到。

隨盒附件削咗啲

可動性就維持Robot魂一向嘅高水準，就同龍王丸一樣，由於肩關節可以大幅度向外拉出，藉此擺出雙手持劍嘅招牌甫士，而且透過簡單步驟，就可變成黃金龍形態，龍口既可開合，龍頸又由四組關節串連而成，令龍頭可以上下移動外，亦可向左右扭動，擺飛龍在天嘅甫士時就更生動、更多變化。可惜附件方面比唔上舊年出嘅龍王丸，主角戰部渡（港譯「戰部飛雲」）嘅Figure當然唔少得，純屬意料之內；最令人介懷反而係武器只有一把光龍劍，龍王丸Boxset中大受好評嘅出拳及出劍特效Parts，龍星丸竟然一件都冇，但係標價同龍王丸一樣（￥6,000），咁仲唔係變相加價？

Tamashii本周六開壇

各位玩具迷，尤其是日系機械人粉絲敬請留意，Tamashii Feature's Vol.7將於本周六於九龍塘嘅創新中心盛大舉行，今屆以機械人（Robot）為主題，當中以Robot魂為首，仲有Metal Build、GFFMC及超合金等多個系列展出。除此之外，同場仲有聖衣神話10周年特別展區，據知早前喺日本展出嘅純金製射手座，亦會藉今次盛會移師香港展出，仲有Figuarts Zero及SHF等Figure系列壓陣，不過留意展期有限，只得兩日，玩具迷記得Mark實日子朝聖喇！