眾樂樂 Super Gear × Nissan Serena

正所謂獨樂樂不如眾樂樂，除非閣下命犯天煞孤星，注定成世獨家村，否則去玩去威，梗係約埋成班friends先算盡興！好似有港版AKB48之稱嘅樂壇女子組合Super Gear，平時出function之後，姊妹們仲會相約四圍去，今次隊中四位成員Kinki （葉曉婷）、Milky （梁婉微）、Bear Bear （鄭頻敏）及Sylvie（林英漣）就約埋去白石打Golf兼食串燒。咁多靚女，有架七人車接送就fit晒，日產（Nissan） Serena Green Highway Star SH正好大派用場。

有近百條Driving Range高爾夫球練習道，一於約埋成班friend齊齊進行開球禮。

Super Gear必試推介：日本汁醬熟鰻魚，每串$88 。

自動雙電趟門設有One Touch功能，用手指輕按門柄上粒掣，就可控制車門開關，唔使刮花指甲，Bear Bear （左）及Sylvie （右）都讚Like。

將中、後排座椅齊齊放平，就變成一張大床，你睇Bear Bear （左）及Sylvie （右）個樣就知有幾舒服。

Kinki （左）及Milky （右）話最鍾意車頂嘅巨型天幕，無論日夜都可增加遊車河嘅興致。

前排椅背設有小餐桌，方便喺車上用餐或進行文書作業。

Super Gear都幾識揀，事關白石俱樂部唔只坐擁吐露港靚景，場內仲有高爾夫球練習場及燒烤場，前者設有近百條球道，咪話上述四位美少女，成隊16人嘅Super Gear齊莊嚟到，都可以齊齊開球鬥一番。至於燒烤場靠近海旁，最近仲新增串燒區，供應各式海鮮、肉類及素菜等近50款美食，而且為咗減少油煙積聚，場內採用環保微煙炭之餘，每個爐位上方都裝咗強勁嘅管道式抽氣系統，座位周圍又有風力特強嘅電風扇送爽，邊個話大熱天時唔可以BBQ？另一方面，場內設有大量免費泊位，方便車主一族，揸車嘅話可於出獅隧或大老山隧道後往馬鞍山方向前進，經過馬鞍山繞道駛至烏溪沙站對開迴轉處，跟住「白石」路牌由西沙路左轉入落禾沙里，直駛至盡頭就到。

S-Hybrid慳油有道

雖然Serena車身尺碼有番咁上下，不過相當慳油，呢方面歸功於此車導入咗最新嘅S-Hybrid系統，透過增大ECO Motor嘅發電能力及輔助電池，從而提高Idling Stop嘅時間長度及頻密度。今次試車穿梭港九新界，全程試咗四日，期間駛經繁忙擠塞嘅市內道路之餘，就連高速公路都唔放過，交車時根據儀錶板顯示耗油量為10.6km/L，似乎同廠方公布嘅平均數值（15.2km/L）有少少距離，不過考慮到香港燈位特別多嘅關係，實屬情有可原，況且10.6km/L呢個數值已經有晒交代。慳油之餘，Serena嘅性能表現亦都交足貨，2.0L直四引擎配合XTRONIC CVT波箱，馬力及扭力輸出分別達至147ps及21.4kgm，上斜時毋須狠狠催谷引擎，半油門已經有唔錯嘅加速表現。

車廂體貼個個Like

車廂方面，Serena有唔少窩心設計討得四位Super Gear成員歡心。本身已經係車主嘅Kinki，最鍾意座位布局靈活多變，尤其是將中排兩張獨立座椅放平，再與後排連接，就變成寬敞臥床，好好休息充電之餘，仲可以透過大天幕觀星浪漫一番。至於鍾意遊車河嘅Bear Bear，就偏好大車窗設計，置身車內都擁有近乎360° 全景觀視野，唔會錯過沿途風景。啱啱由學神榮升P牌仔嘅Milky，就最Like中排附設嘅太陽簾，陽光猛烈時拉起，正中女仔最怕曬嘅需要。跟Bear Bear一樣仲係無牌一族嘅Sylvie，笑笑口話夏天最好去沙灘，吹氣玩意加手提冰箱自然唔少得，置物量充足嘅Serena正好大派用場。