5吋 One Touch Idol X 機薄餡靚

下個月先係中秋節，不過周街都已經見到月餅廣告。月餅就話要皮薄餡靚，原來用來形容手機都一樣得。近年畀「地板油」出機嘅Alcatel最近又有新作One Touch Idol X，跟潮流用上5吋全高清大芒，睇相、煲劇正！最驚喜嘅就係佢機身大大部，但竟然只厚6.9mm；加上內置1,300萬像素鏡頭及四核心處理器嘅高規格，話佢「機薄餡靚」絕不為過。

售價待定（九月底推出）

5吋大芒加上窄邊框，單手拎機都好輕鬆。

內置Ultimate Saver Mode，可將數據等功能全部熄掉，淨係留番電話、聯絡人、SMS、日曆四樣基本功能，超慳電。

可以將個別Apps於主頁中隱藏，有咩秘密都唔驚畀人見到。

SIM Managment可以設定預設SIM卡，而且每逢撥號、SMS前都可以拉低狀態欄隨時更換使用主卡。

1,300萬像素鏡頭對焦快，不過成像邊位略嫌鬆散。

機身只厚6.9mm，大芒機來說屬於激薄級。

雙卡卡槽分別喺機身左右兩側，換卡都好方便。

機背有磨沙處理，手感唔錯。

好「色」機背

以往國產手機賣相成日畀人彈，今次Idol X總算爭番啖氣，佢採用一體成型設計，機背係磨沙塑膠物料，啜手得來亦好手感。配色方面有四隻，當中包括鮮紅同鮮黃色，以及小記最鍾意嘅深藍色，低調得來睇落又有少少閃粉效果，加上比較襟污糟，男用家應該Buy；至於白色款香港目前未返貨。此機機背夠靚，機面都一樣有睇頭，窄邊框之外，最大亮點就係其5吋屏幕，解像度達1,920×1,080，兼採用IPS素材，色彩準確，仲有170度可視角；最難得係5吋大芒機竟然只係厚6.9mm，比同尺寸嘅Galaxy S4及Xperia Z還要薄。

易用新介面

規格方面，此機搭載1.5GHz四核心處理器以及2GB RAM，揭頁、打機都好順暢；可惜只內置16GB容量，亦不設microSD記憶卡擴充，鍾意擺大量MP3及影片就未必夠用。比較特別是雖預載Android 4.2作業系統，不過Alcatel就將介面改頭換面，Widgets、Icon似足iOS 7之平面設計，更好似iOS般棄用功能表，所有Apps都放晒主頁，用落更就手。美中不足是此機並不支援4G制式，不過就有雙卡雙待功能，中港兩邊走嘅朋友就啱用喇！