好音樂豈只可以繞樑三日，十年、甚至一世都得！唔經唔覺，「哥哥」張國榮已經離世10年，除咗留低唔少動人慢歌，其實《無心睡眠》、《Monica》等勁歌一樣Unforgettable，尤其是喺2000年《熱．情演唱會》主唱《大熱》嘅長髮Look，華麗與狂野集於一身，如此台風更係冇人能及。作為「哥迷」嘅Hot Toys主腦Howard Chan，對呢一幕自然入晒腦，近日就以此為藍本，推出第二款1/6哥哥Action Figure，勢要大家一追再追！

零售價︰$1,680
預訂價︰$1,580
推出日期︰今年第三至四季

一頭過肩頭髮用植髮製成，貼服又易打理。

當年哥哥特登留鬍鬚兼曬黑少少，Yulli都一一跟足，塗色時輪廓更加突出。

戴埋開窿手套，不過留意手套與手掌一件過啤膠製成，唔除得。

跟番當年哥哥所着嘅銅色皮鞋，而且打埋光油，更見「令身」。

外套用幻彩布料縫合而成，衫腳又內藏鐵線方便定型。

恤衫及皮帶扣都有相片做參考，剪裁、大小都逐一跟到足。

地台參考紅館舞台，唔只有射燈，正面又有名牌，別具收藏價值。

神似度大幅升呢

「大熱，像赤道重疊；命運，註定若離別」，事隔多年，天生記性麻麻嘅小記，依然對《大熱》歌詞琅琅上口，未算Die Hard粉絲都尚會如此，更遑論係哥哥忠實粉絲的Howard？所以《大熱》1/6 Figure其實早已經係HT嘅Main Target，相比起上次趕工開發嘅「繼續寵愛．十年」禮服版本，今次頭雕師Yulli有更多時間揣摩、落刀，加埋上次嘅經驗，今次頭雕嘅神似度實在有大幅提升，五官、輪廓秒到毫巔唔在講，略為皺眉加上微微低垂嘅雙目，仲將哥哥憂鬱一面表露無遺，難怪連哥哥前經理人陳淑芬女士都大表滿意。

藍光射燈舞台

《大熱》之所以大熱，除咗因為節奏強勁，哥哥前衞不羈、能人所不能嘅形象亦應記一功，試問除咗「明哥」黃耀明，又有邊位香港男歌手可以留長頭髮留得咁型、咁Chok？化身1/6 Figure，HT就以植髮交代，由於完全順直，所以比之前同廠嘅Black Widow鬈髮貼服、易打理得多。服裝方面，HT特別從陳太處借嚟當年嘅銅色歌衫相片做參考，用色、剪裁跟到足，其中外套嘅外圍仲內藏鐵線，輕輕一扭就能「隨風擺動」，做出飄逸效果。配件方面未算大陣仗，但貴精不貴多，Mic Stand固然唔少得，最正係地台加入藍色LED射燈，令哥哥喺舞台上嘅華麗形象，傳神地重現出嚟，如果你當年都有入場睇Show嘅話，今次嘅《大熱》Figure一定會勾起閣下唔少美好回憶。

查詢︰2388 4677（Toy Hunters）