筆者先行「利申」，我鍾意睇波、踢波，但從未賭波，事關我冇錢、亦冇膽去賭，唔怪得我做唔成球星啦！咪誤會呀，我唔係話球星爛賭呀（做得球星就更加唔好賭啦，利益衝突嘛），而係成功嘅球星，多數都擁有「賭徒」性格，就係膽大心細，玩到對手陀陀擰。Warrior第二款波Boot系列就以Gambler為名，唔通「賭神」高進入股Warrior？

雖然仲要等多少少日子，Gambler Pro先至喺香港有售，不過愛華頓嘅費蘭尼（M.Fellaini）及黑池嘅恩斯（T.Ince）等球星，已經着緊踢比賽。

短釘設計切合香港嘅球場環境，至於較多嘅鞋釘數目可望增加抓地能力。

鞋面有好大部分採用Tech Mech織物製成，配合Safe House膠條加固，發揮舒適、輕量化和支撐度高等優點。

資深嘅賭徒，能夠運籌帷幄、操控全局，Warrior Gambler就以控球為大前提，由腳弓位置再到鞋頭內、外側，分別用咗Ace Plate、High Roller及Outsider Zone三種設計，旨在加強鞋面與足球嘅摩擦效果，令用家無論推波過人，或者轉方向嘅長傳，甚至失驚無神冷箭施射都更加準確到位，成場波嘅走勢都走唔出你嘅「腳」指罅。除此之外，基於舒適性所需，Gambler用咗無縫鞋櫳，仲將呢種設計命名為Royal Flush「同花順」，夠抵死！外底方面，有別主流嘅13、14粒鞋釘設計，輸港版Gambler Pro多達17粒，藉此提升抓地效果，細心嘅話仲會發現鞋釘長度比主流嘅FG波Boot略短，話晒Warrior係美國牌子，而美國球場多數都係仿真草場，兩者之間是否有關就不得而知，不過呢種設計頗切合香港實際環境，除咗因為愈嚟愈多仿真草場外，就算係真草場嘅草都唔長得去邊，傳統FG嘅長釘設計反而會影響靈活性。

查詢：

2300 1155（旺角奶路臣街興發）

2398 0004（旺角砵蘭街Saflo）