Sam哥真係忙，又要飛英國、再要去也門、車臣、利比亞同巴拉圭，仲要跟唔同國籍男子交手。喂！呢度所講的Sam哥並非電視劇那位機師，而係《Splinter Cell》系列中戴夜視鏡的特種部隊猛男Sam Fisher。自上集《Conviction》行動之後，Sam哥會在新一集《Splinter Cell: Blacklist》搗破全球最大規模恐怖行動「Blacklist」；本集勝在可自訂全身裝備，潛行刺殺時更可使出個人Style！

正面駁火唔係唔得，不過敵眾我寡，其實唔多着數。

當被敵人發現後，會在被發現位置顯示出「鬼影」，遠離「鬼影」可解除威脅。

今集Sam哥身手依然不凡，半夜爬牆玩潛入都難佢唔到。

傭兵會轉為第一身射擊方式進行，火力超強大。

玩《Splinter Cell》最緊要忍，等待時機成熟先出手。

到達每個執勤地點，都會在地圖上顯示出執勤城市名稱，如圖中是利比亞班加西，好有型！

透過無人迷你偵察機，可以毫無危險地偵察敵陣。

在雙人模式下，Sam哥跟Issac都會同場出動，合作場面總少不了。

從背後突襲摔到敵人之餘，仲可殘忍地額外送多一刀。

新梯隊幫Sam哥手

Sam Fisher上次出動已經是三年半前的事，今集Sam哥之所以出山，是因為有群名為Engineers的恐怖分子，認為美國在全球三分二國家有駐軍實在太霸道，因而恐襲美國，故事設定夠真實。家陣Sam哥年紀唔輕，因此所有任務都不會單獨行動，遂有新梯隊隊員Anna Grimsdóttir、Issac Briggs同Charlie Cole幫手，一位負責科技，一位提供強大火力，一位就做黑客，不過主要秘密任務都係要靠Sam哥飛簷走壁潛入敵陣殺敵及盜取情報。

任揀三大執勤風格

《Splinter Cell》系列取向唔似得《Call of Duty》般擺明開戰駁火，主要係靠潛入敵陣，無聲無息完成任務，恍如現代版《Assassin's Creed》！假如被恐怖分子發現，開槍或引發其他聲響時，會有警號響聲提示玩家，而被發現的位置更會留下「鬼影」；驚青的話可以逃走，又或者可以喺附近位置埋伏伺機解決對手，行動風格相當多變。《Splinter Cell: Blacklist》引進了三種新行動風格，如「Ghost」風格就要盡可能避免濫殺，快速完成任務並離開；「Panther」風格則會大無畏地來個正面衝突；至於「Assault」風格就要玩家具效率地殲滅恐怖分子。而用不同風格完成任務，都可得到相關獎勵！

迷你偵察機深入敵陣

遊戲地圖收錄多達14個國家，除倫敦、芝加哥等大城市外，大部分版圖都坐落中東、北非。遊戲中Sam哥雖然唔係機師，但其所屬的梯隊可動用無限資源同最尖端科技，甚至連多用途隱形飛機都有一架，因此可以迅速趕到世界各地反恐。最先進部隊當然有最先進的裝備，Sam哥頭戴的夜視鏡是其一，另外亦可使用升級版蛇管攝影機以及遙控迷你無人偵察機深入敵方巢穴睇清環境，亦能用上經典裝備電擊彈同鷹爪刀，後者在背後施襲時好有用！

個人化設計亦有所改進，除了可揀選所攜帶的武器外，連衣服、軍備都有得買、有得換，更可提供主角的屬性！主線任務好玩外，必定要試埋經典的「Spies vs Mercs」玩法，它以四對四作戰方法進行，一方扮演間諜以第三身方式行動，扮傭兵就會改用第一身方式殺戮，兩種截然不同風格對戰時都幾有趣！

INFO

類型：動作射擊

開發：Ubisoft

平台：PS3、Xbox 360、PC

推出日期：8月22日（英文版） 9月5日（中文版）

售價：$388（PS3） $360（Xbox 360） $299（PC）

查詢：2359 7998