唔經唔覺，Bandai嘅SHF系列已經推出五年有多，出過嘅Figure逾200款，當中絕大多數都係「拉打」幪面超人角色，可想而知無論由昭和年代嘅舊一號，到平成年代嘅龍騎、W，以及現役嘅Wizard等等，似乎都出到七七八八，唔通SHF已經完成佢嘅歷史（搶錢）使命，拉打迷望到家鄉？別開心得太早，數數手指，其實仲有《幪面超人劍》（2004至05年於日本首播）未出喎，當中由男主角劍崎一真變身而成嘅Masked Rider Blade，就喺今個月登陸SHF。

SHF Masked Rider Blade 建議零售價：$389

與同系嘅昭和一、二號拉打一樣，Blade都有專用腿風特效組件，效果似足劇集場面咁有氣勢。

連腳眼及頸位呢啲細微位都做足葵扇花，認真指數爆燈。

劍柄以換件加黐貼紙形式，展現用Undead卡出招嘅招牌動作。

隨盒有爆石組件，可以同Blade本體合組成劍擊大地嘅氣勢甫士。

Blade嘅進化體King Form，亦將會推出SHF，現已在日本接受網上訂購，希望好快都會登陸Premium Bandai HK（http://p-bandai.hk/hobby/）。

以為SHF拉打就快出完，銀包唔使再出血？太天真喇，Bandai早前宣布將會推出Ver.2.0版本，頭炮係10月上架嘅Black（右）及戰蝗號（左），建議零售價分別為¥3,500及¥4,500。

富野由悠季

雕工塗裝都值Like

牛唔飲水唔撳得牛頭低，其實筆者都係揀款嚟買，老老實實，有啲人氣弱、做工削嘅SHF拉打，只好眼不見為乾淨、慳番筆好過，不過今次嘅拉打Blade就好難忍手。首先雕工的確交足貨，唔只胸甲、肩甲及腰帶，全身多個位置，包括上臂、大腿、腳眼、鞋底，甚至頸位都有袖珍形嘅葵扇圖案，冇話偷工減料慳得就慳預你睇唔到；筆者最Like係頭部正面既有精細紋理，最外面再冚咗一層透明膠，配合「透明紅」嘅複眼，整個面相充滿剔透感。至於塗裝方面同樣抵讚，準確、冇出界唔在講，最抵Like係金、銀色位置都用咗傾向Metallic嘅顏料，就算成隻Figure都係塑膠製品，啲盔甲位睇起上嚟都有金屬質感。

特效Parts夠神氣

好睇之餘，SHF Blade亦相當好玩，平成年代嘅拉打大玩插卡文化，龍騎、電王、Decade，就連Blade都係，SHF版本除咗有八張Undead封印卡外，劍柄又可以換件，變成招牌式嘅插卡出招甫士，不過並唔係逐張卡插入劍柄，而係要玩家喺劍柄組件嘅正、背面黐貼紙，全數24張，筆者貼完都眼坦坦，不過效果又幾唔錯，有番劇中七、八成神髓，咩都抵番晒啦！除此之外，隨盒又有名副其實嘅「爆石」組景，可以擺出有如「石中神劍」嘅有型甫士外，又有腿風特效組件，似足劇中起飛腳咁虎虎生威。

高達之父下周六來港

銅鑼灣時代廣場舉行嘅高達展覽，唔只吸引無數本地高達迷朝聖，據知日本方面都有廣泛報道，就連「高達之父」富野由悠季老師都知道，並且將於下周六來港觀摩之餘，仲會於當日下午兩點半幫30位粉絲簽名；想成為當中嘅一分子，可於即日至下周二期間嘅早上10點至晚上10點，到時代廣場二樓客戶服務部攞番張Gundam遊戲券，填妥個人資料及答案，再投入客戶服務部嘅收集箱，大會就會選出答得最好嘅30位得獎者，於下周四或之前以電郵或電話方式通知，高達迷要把握機會喇，詳情可到facebook嘅Hong Kong Times Square專頁瀏覽。

ISHIMORI PRODUCTION INC. and TOEI COMPANY, LTD. All Rights Reserved.

查詢：2433 1828（瑞華行）