紐約直擊：LG G2 機背按鍵單手Snap

紐約Lincoln Center常有藝術表演，晚上車水馬龍，不過美國時間8月7日晨早10點幾，竟然都有幾百人喺度，原來大家出席LG旗艦新作G2發布會。唔少傳媒都揣測G2會喺機背加入指紋辨識器，結果估錯晒，LG意想不到地將平時設喺機側嘅音量鍵、電源鍵改到機背，呢個創新設計出奇地就手，5.2吋單手拎都超Easy，音量鍵仲可以化身快門鍵，可輕鬆單手Snap同自拍！據講此機兩個月內就開售，儲定錢咪落後喇！

今次發布會規模咁大，LG Mobile嘅話事人Dr. Jong-seok Park當然有到場啦！

現場坐滿近700人，各國Media都有嚟！

現場仲有Vienna Boys' Choir成員獻唱，而新機入面亦有佢哋歌聲作鈴聲。

體驗區人頭湧湧，想玩機都要畀啲耐性等吓。

同場仲有耳機，採用入耳式設計，音質不俗。

機身面及機側都冇任何實體鍵，超簡約。

機背採用塑膠物料，手感一般。

機頂設有多色提示燈，來電或鬧鐘響時會亮起。

機底設有雙喇叭，音量都幾大。

5.2吋嘅G2（右）仲細部過5吋嘅Xperia Z少少，設計值得一讚。

機身就得黑白兩色，不過機套就有大把色畀你揀。

支援OIS防震技術，手持拍攝穩定得多。

QuickWindow Case一蓋上屏幕就可以喺窗仔內睇時間、天氣、音樂等資訊。

機身唔算大部，女士都可以輕鬆單手揸機。

Tracking Zoom
可以將拍攝中嘅影片局部放大玩大特寫。

Plug ＆ Pop
將耳機或者USB線連接機身，即會自動彈出適合嘅Apps。

KnockON
只要連敲屏幕兩下就可以着芒或者熄芒。

Slide Aside
用三隻手指向左掃就可以收起使用中嘅Apps，方便玩多工作業。

Guest Mode
可於自訂主頁設定開放哪些Apps，唔想小朋友亂玩就最啱使。

Text Link
幫你辨識SMS內容，再連接到日曆自動輸入相關時間、地點等資料。

前方虛擬鍵設定
其排列可以隨意轉換，就番使用習慣。

QuickRemote
可以將手機當做家電遙控，電視、冷氣機都啱用。

試相
街頭試拍，日光日白對焦好快，而且成像好紮實，放落電腦睇都一樣咁靚。

行內人士點睇
《Mobile Magazine Sweden》記者Kalle Wiklund：「設計比其他廠商明顯豐富，個人最鍾意就係 Tracking Zoom功能，好過癮！」

盡用機面空間

G2發布前，網上有傳聞話此機將採用5吋以上嘅全高清屏幕，結果Bingo! 5.2吋屏幕解像度及像素密度分別達1,080p及423ppi；而且繼續採用自家IPS素材，顯示顏色準確冇味精，加上可視角闊、亮度夠高，睇得舒服。然而最令人拍爛手掌係G2機面不設任何實體鍵之餘，更大幅度將屏幕四邊位置「偷走」，左右邊框大玩2.65mm超窄邊，屏幕佔機面面積75.9%；所以就算有個5.2吋大芒，但係機身都唔會特別大部。即場攞Galaxy S4以及Xperia Z兩部5吋機比較，發現5.2吋嘅G2細部少少，加上微弧機背以及8.9mm厚度，單手拎機確實好容易。

背鍵多創意

講完機面，就到重頭戲─機背。一般智能手機的機背最多只會設有後置鏡頭、閃光燈等配置；今次G2就突破常規，於鏡頭下方加入音量鍵以及電源鍵共三個實體鍵。第一眼睇確實有啲突兀，不過用落其實幾就手，用食指基本上可以輕鬆控制音量大細、屏幕開關等操作。據LG表示，這新設計乃是參考用家使用習慣，無論左手抑或右手，好多人都會慣性將食指輕輕托住機身，所以就設計出以食指操作嘅機背按鍵。除原有嘅功能，三個按鍵亦有其他作用，熄芒時長按「Volume -」就可以啟動相機功能，同時亦可當作快門鍵；而屏幕開着下長按「Volume +」即開啟Quick Memo記事程式。比較特別是G2新增名為「KnockON」功能，只要於屏幕以手指快速連敲兩下，就可以控制着芒同埋熄芒，實在方便。

高音質直播

近年愈來愈多用家鍾意聽高質數碼音樂檔，不過就要掟幾千銀專登買高階Music Player先聽到。G2嘅用家就冇呢個煩惱，皆因佢支援播放24bit/192kHz嘅FLAC、WAV無損音樂檔案，音樂發燒友肯定鍾意；美中不足係此機並不支援外置記憶卡，最大容量版本亦只得32GB，未必放得落大量歌曲。規格方面，G2採用時脈達2.26GHz的Qualcomm Snapdragon 800四核心處理器，再配合2GB RAM，載入遊戲及Apps都好快、好順暢。G2的拍攝功能也值得一提，不但備有1,300萬像素鏡頭，而且鏡頭組更內置光學影像穩定器（OIS），可以於搖晃不定以及低光環境下保持影像穩定；另外亦提供可將影片局部放大玩大特寫嘅Tracking Zoom功能，以及前後置鏡頭同步影嘅Dual Camera等玩味功能，效果好過癮！