
建議零售價:$1,299
當三一萬能俠、超力電磁俠、六神合體,甚至宇宙戰艦大和號等等,都已經畀「超合金魂」出勻晒(仲未計出過N咁多個版本嘅鐵甲萬能俠),相信好多合金迷都在心底怒吼:「到底幾時輪到太空保衞者呀!」Bandai終於喺本月回應訴求,而且質素之高,亦不枉大家等咗咁多年,尤其是唯美重現子母機合體嘅變形設計,童年回憶即刻返晒嚟!


肩膊關節可以向前拉出,增加雙臂嘅活動幅度。

機輪可以從主體內伸出(上),如果嫌唔夠力、唔靚仔嘅話,亦可改用額外嘅機輪附件,當堂實淨晒。


子母機形態之下,機頭可以打開,放出Sky Arrow。


Double Shaft既可分離,又可合體,跟足動畫機設。


拆走心口嘅機輪(左),就可換上加農炮組件,但冇特效組件點綴,徒具虛形。


Sky Arrow(右)首度實體化,唔只造工精細,仲可以變成單座或雙座位形態。

點解會講到《太空保衞者》咁巴閉?首先呢部原名為《惑星Robot Danguard A》嘅「超級系」科幻動畫,1977年喺日本首播,香港嘅電視台亦都好快手,78年就有得播,當年嘅電視威力,似足今日嘅Internet,太空保衞者想唔紅都難,何況呢部動畫背後大師雲集,原作者係松本零士、荒木伸吾擔任人設、菊池俊輔包辦音樂,嗒落分外有味道。
子母機合體無可挑剔
至於最引人注意嘅機設部分,太空保衞者有別於當時主流嘅五機合體模式,話說喺故事之中,會先以子母機形態(Satellizer)由史丹姆母艦起飛,跟住主駕駛員田熊嗌出口號,機頭就會放出小戰機Guard Launcher,而子母機嘅上、下部分就會分開,上半部分變成腰部及雙腿,下半部分變成上肢及雙臂,之後兩者前、後結合,最後小戰機變成頭盔,套落太空保衞者嘅頭上,咁就大功告成(原著話成個過程五秒搞掂)。當年嘅機設天馬行空夠出位,但係要實體化出玩具,對各大玩具廠而言都堪稱「大整蠱」,最元祖嘅POPY合金玩到變形合體已經收貨,靚唔靚仔簡直係不必苛求;2008年由Yamato推出嘅「群雄.鋼」合金版本,機械人形態無論造型以至可動性都堪稱極品,不過變成子母機,就顯得機頭太短、機尾太長,而且機輪以換件形式另行加上,變形過程未算完整。啱啱上架嘅超合金魂版本,機輪已經內藏於機身之內,前臂又可以毋須拆件,簡簡單單就縮到入胸膛內,最重要係機身前後以至上下嘅比例,都忠於原著美形起嚟,雖則變飛機時要喺大腿加上一件透明組件作加固之用,但係呢件Parts唔大件、唔顯眼,而且的確可以增加穩固度,令大家玩得安心,相信粉絲都唔會喺雞蛋裏挑骨頭啩!
武器附件未盡完美
變形誇啦啦,不過隨盒附件就有讚亦有彈,當中備有兩款頭盔,一款可以變成Guard Launcher,仲可以套入機輪組件,另一款就只係頭盔形態,後者似乎有啲多餘;至於另一部劇中支援用嘅訓練戰機Sky Arrow,無論POPY或Yamato版本都未出過,依家就由超合金魂首次實體化,仲可以變成單座或雙座位形態,抵讚!可惜武器方面實在有啲削,雖則太空雙矛Double Shaft合到體,心口又可以拆走機輪,換上脈衝加農炮Pulsar Kanon組件,不過早五年推出嘅Yamato版本,唔只炮口有特效組件,就連拳頭同膊頭都有,可以傳神重現放飛拳及放飛彈嘅甫士,超合金魂就一件特效組件都冇,咪同我講Bandai做唔到囉,同廠嘅「SR合金」細成個碼都出到,呢一點成為筆者只能畀出「極好」,但未至「完美」嘅評級原因。
(c)松本零士.東映アニメーション
查詢:2433 1828(瑞華行)