國產名牌雙卡伴「旅」

呢個夏天雨水特別多，想親近太陽伯伯，離港似乎係其中一個方法。去到外地，想慳漫遊費用的話就最好買張當地SIM卡，配合埋自己張Voice SIM及雙卡雙待手機，就可以煲粥打卡一Take過！最近兩個來自內地的手機名牌就不約而同推出雙卡手機，Alcatel Scribe HD8008D主打大芒配件足，而Huawei Ascend G525則二千有找力Sell性價比，大家不妨各取所需！

採用自家Emotion UI，抽走App Drawer，程式全放在首頁，開啟更快捷。$1,680（a）

僅配備500萬像素鏡頭，又冇補光燈，拍攝規格一般。

對應雙卡，用的是大SIM，並需拆電才能更換。

電池容積為1,700mAh，2G通話只得5.8小時，未免太短。

厚9.9mm，4.5吋手機來說，算合格了。

可直接在解鎖畫面開啟撥號、短訊及相機等功能。

預載三款介面主題，嫌唔夠仲可上網「單撈」。

可更改主副SIM卡功能，撥號、上網分卡處理。

介面類似公版設計，最多提供五版首頁。$2,499（b）

800萬像素鏡頭連補光燈，規格中上。

有Magic Flip保護套，只要把磁石接位貼於機背，即能連接。

一體成形設計，兩張microSIM要打側插入。

隨機附送觸控筆，畫圖寫字更得心應手。

《Scribe Note》是畫圖程式，並有不同顏色及線條粗幼供選擇。

只要在《Scribe Calculator》手寫方程式，系統就會自動計出答案。

內置《Currency Converter》，提供實時匯率計算，外遊Shopping靠晒佢！

小記每逢出門玩，例必買番張當地Data SIM，貪佢上網比漫遊平一截之餘，仲可以同Voice SIM一同放入雙卡機內，一張上網、一張傾電話，好方便！今次介紹的兩部新機均支援雙卡功能，同樣對應一組GSM及一組3G網絡，用戶更可設定主副卡功能，撥號、上網、收短訊分工處理，夠晒清楚！

送千元配件

Alcatel自從被TCL收購後，推出產品的步伐要比以往快許多，早陣子才推出One Touch Star，最近就有同屬雙卡設計的HD8008D接棒。驟眼睇它跟一般5吋大芒機分別不大，但原來屏幕表面有黑水晶成分，既增加透光率，也能加強耐磨耐刮能力，一舉兩得。其厚度僅8.5mm，重量亦僅得135g，配合微彎邊框，手感相當好。配件是它的另一賣點，隨機附送觸控筆、磁石Magic Flip及Wi-Fi Dongle，全部加埋差不多價值成千元，相當吸引！

支援DTS音效

至於Huawei Ascend G525，它早前跟全球最薄的Ascend P1同期推出，雖然注目度被比下去，但其實規格也不弱；內置4.5吋qHD屏幕，並應用了IPS顯示技術，色彩自然亮麗且可視角度高。另外亦對應「DTS」音效，一經開啟音場即變得廣闊，環迴立體聲更為通透。外觀是較失色一環，直板黑色機身加上磨沙背蓋，雖具防污功效，但未免過於平實，而且重量達155g，手感亦一般。然而考慮到售價不用二千元，還可投訴甚麼呢！

同搭載四核心CPU

雙卡機預咗機能唔強？大錯特錯！以上兩台手機均搭配了1.2GHz四核心及1GB RAM，運行Jelly Bean系統由撥頁、上網，到睇片都相當流暢，除非玩大食Game，否則一般應用絕對綽綽有餘。介面是兩機另一不同之處，HD8008D用近似公版設計，只是程式Icon全變成圓形，令觀感更佳，另外又預載了《Scribe Calculator》及《Scribe Note》兩大程式，方便用戶計數畫圖；而G525則用自家Emotion UI，抽走了App Drawer，提供大量網上介面主題，用戶可免費「單撈」，時刻保持新鮮感！