日漫勢力醫生擔正

仁心仁術

展位：C12（文化傳信）

《青年怪醫黑傑克》Vol.1$35

由大熊由護繪畫，以及專門創作熱血劇情，例如《真鐵甲萬能俠Zero》嘅田畑由秋擔任編劇，既係紀念《怪醫黑傑克》40周年嘅紀念作，也可視為Black Jack前傳。故事講述Black Jack仲未成為黑市醫生之前，以「黑間男」嘅身份喺醫學院研習，面對動盪不安嘅日本社會，黑間男需要一筆天文數字嘅巨款去完成某項重要大事，到底箇中有何玄機？又會對Black Jack往後嘅人生歷程有咩影響？香港首版將會附送B5透明膠板墊一張。

展位：C12（文化傳信）

《GUY~移植ON CALL24小時》 Vol.1$35

由安藤慈朗編繪，故事主角渡海醫生是器官移植嘅世界權威，佢遠赴美國大顯身手，病人男女老幼無分性別國籍，都可施展「神之手」進行各式移植手術，拯救一條又一條嘅寶貴生命。故事大綱看似神奇，其實劇情係根據真人真事改編而成，感人之餘亦更見說服力。

剩男出城

展位：D29（玉皇朝）

《鹹味人生！Saltiness》Vol.1 $38

以《去吧！稻中兵團》打出名堂，無論由故事到畫風都大走偏鋒嘅古谷實，再度出招引爆笑彈。故事主角係一個隱蔽咗14年嘅剩男，為咗令妹妹放心，決定離家出走，到東京過獨立生活；一時衝動又唔識照顧自己，剩男一直為身邊人帶嚟麻煩，仲衰到三餐不繼，到底佢可否扭轉命運呢？

名著新Step

展位：C12（文化傳信）

《GANTZ殺戮都市》Vol.36 $35

奧浩哉老師嘅《GANTZ殺戮都市》已經去到最後直路，Vol.36正係尾二嗰期，故事講述人類利用GANTZ嘅傳送技術及情報，大舉反擊異星人，大家為即將來臨嘅勝利而興奮時，突然峰迴路轉，被傳送至異空間「真理的房間」。襲擊人類嘅異文明、GANTZ嘅秘密……一切謎團由此解開。

展位：B40（正文社）

《NARUTO狐忍》Vol.65$30

岸本齊史編繪嘅《NARUTO狐忍》，邁向第65期，今期就玩前代火影大集合！內輪斑成功召喚十尾，令鳴門眾人陷於苦戰，另一方面畑鹿驚跟帶土嘅因緣之戰亦難分難解，呢個時候第三勢力大蛇丸突然出現，仲利用秘術穢土轉生，將歷代四位火影召喚出嚟，到底所為何事？

展位：D29（玉皇朝）

《MASTER KEATON 危險調查員》完全版Vol.3 $60

危險調查員奇頓，今次要面對棘手嘅炸彈襲擊案，犯人將炸彈放置喺手袋內，再混入大型百貨店內，由於當中嘅建築物用咗玻璃幕牆建成，一旦爆炸嘅話，衝擊波會震散玻璃，造成大量傷亡；即使奇頓幾經辛苦搵到炸彈，但要面對難纏嘅震動感應器，點算好？原來解決方法就喺朱古力店，咁奇都諗到，大師即係大師，浦澤直樹，你好嘢！

Update玩物誌

早前我哋都介紹咗唔少動漫節嘅新Figure、新玩具，原來仲有唔少正嘢今日先會正式發布，以Hot Toys為例，就失驚無神宣布推出Iron Man MK.ⅩⅩⅩⅢ（Silver Centurion），安排喺場內率先預訂，送特別版配件（MK.XLⅡ戰損版頭盔）一個，再加精美海報喎，問你點忍？除此之外，八月先至有得賣嘅SHF Sailor Moon及MG Gundam RX-78-2 Ver.3.0，亦會喺場內率先展出， 畀香港粉絲先睹為快。

華英雄出山

要數最具代表性嘅經典港漫，《中華英雄》肯定係大熱選擇之一，今屆動漫節仲會重出江湖！事關喺文化傳信展位內，就有一系列嘅《中華英雄》精品推出，包括12"嘅華英雄首辦、6"對戰情景擺設及手雕鍍金版畫等。事先張揚《新著中華英雄2013》將於下月中推出，由《少林寺第八銅人》嘅鄺彬強擔任主編，封面更搵嚟邱福龍主理，令人期待。

展位：C12（文化傳信）

活動小資料

名稱：第15屆香港動漫電玩節

日期：即日至本月30日

時間：10:00am-9:00pm（7月26至29日）10:00am-8:00pm（7月30日）

地點：香港會議展覽中心1號展廳

票價：$30（除可現場購票，7-11及OK便利店亦已開始預售）

網址：www.ani-com.hk