HTC Butterfly S高追蝶機

色彩鮮艷、翩翩起舞的蝴蝶，向來深得人所喜愛，估唔到手機界嘅蝴蝶都同樣令人着迷，所說的就是剛發布嘅HTC Butterfly S。呢部以「蝴蝶」命名的新機，不但外形、設計似足名堂咁優雅，而且更全面引入旗艦作新HTC One嘅UltraPixel超靚鏡頭及動態短片Zoe等招牌功能；再加上5吋Full HD高質大芒以及3,200mAh的King Size電池，規格勁足料，就算定價唔平都值得高追！

$6,198

陽光普照下拍攝再放大原圖，遠方大廈嘅細節都保留得到，成像唔錯。

UltraPixel鏡頭雖然數字上得400萬像素，不過成像比一般手機超班。

跟另一同廠機王新HTC One （右）比較，此機芒更大，而且機身由金屬改為聚碳酸酯，不過就重20g。

前置鏡頭210萬像素好似冇咩特別，但勁在有88度廣角，自拍塞十個人都仲得。

機面輕觸鍵換晒做紅色，襯黑色機面都幾突出。

三隻配色都幾靚，仲統統用上拋光處理。

機身有成10.6mm，都幾厚，好在用上弧形設計，手感都唔錯。

機側兩邊都加入網狀紋，靚仔又防跣手。

雖然唔似得上代Butterfly咁支援防水，不過SIM卡及記憶卡槽都設有保護蓋，要彈就係SIM卡槽好難先開到。

拉低Status Bar就會見到快捷鍵，常用功能都有齊，就手得多。

Benchmark得分比新HTC One仲要高，效能勁啲。

BlinkFeed以方格形式畀你一頁睇晒新聞、社交網絡嘅新訊息，非常方便。

新增HDR影片，於高反差環境都可以拍到高清短片。

內置兒童模式，可以鎖定頁面，只揀選指定Apps畀小朋友玩，唔使驚佢亂撳亂篤攪亂晒。

BlinkFeed新增了《Instagram》以及《WeChat》，加埋舊有嘅Facebook，大路社交網絡都齊晒。

備有多款拍攝濾鏡，又可預覽效果。

依家唔少手機都玩1,080p靚芒，其實HTC Butterfly先係Full HD芒嘅「開山祖師」，呢部大作早於上年年尾分別於日本（日版稱Butterfly J）、內地、台灣等地推出兼大賣，可惜香港冇正式引入，搞到唔少用家都要轉投水貨懷抱。今次呢部HTC Butterfly S正正就係前作嘅升級版，大芒、靚樣等撒手鐧依然保留，仲換上更強嘅規格同軟件，加上行貨有信心保證，今次大把理由換機喇啩？

細緻設計

上代Butterfly個個都大讚外形靚絕，新機Butterfly S就梗係唔使點樣大改，大致沿用上代設計，機身修長加上幼邊框，而弧面嘅聚碳酸酯機背更加入拋光處理，握感舒適，光線下反光仲相當靚仔。雖然體積、設計都同上代好似，不過一眼都分辨到兩部機，皆因此機喇叭由機背移至機面上下，仲用上「BoomSound」雙喇叭設計，音量夠響，聲音仲好有立體感，睇片時就唔使驚畀手掌或者枱面遮住個出聲位。另外，Butterfly S亦好有心思地將機面輕觸功能鍵以及機背鏡頭圓環都轉為紅色作點綴，而且除了白、紅兩隻女士實Buy嘅色水之外，仲追加埋灰色，襯番低調嘅男用家。

硬件全升級

外表同舊作Butterfly差唔多，規格反而似同廠另一大作新HTC One，同樣採用Qualcomm Snapdragon 600四核心處理器，但時脈則提升至1.9GHz，加上內置2GB RAM，用像素密度高達440ppi嘅5吋全高清大芒玩遊戲就最啱；新機仲可以對應64GB microSD卡，「單撈」多幾套高清片慢慢煲亦冇問題。而HTC另一重點功能UltraPixel鏡頭都係此機搵得到，感光元件的吸光力比一般手機高300%，於室內唔夠光嘅環境試拍，成像明顯比普通手機實淨；再加上拍攝影片可以用上HDR，亦保留將三秒影片及相片自動剪輯成短片嘅Zoe以及88度廣角前鏡頭等功能，拍攝功能方面確實足料。

加料BlinkFeed

規格、設計就係集前作之大成，軟件方面Butterfly S則是最新最快。出廠已內置Android 4.2作業系統，配合全新HTC Sense 5介面，一拉狀態欄就會見到屏幕亮度、開關Wi-Fi等11項快捷設定，用落好就手；而BlinkFeed動態首頁亦加料，除可加入新聞、日曆、Facebook等訊息之外，依家就連《WeChat》同《Instagram》都用得，一頁就可以睇晒朋友嘅最新狀況！猶記得當日唔少用家因為水貨Butterfly用唔到4G而卻步，今次行貨當然冇呢個問題，支援900、1,800、2,100、2,600MH頻譜，完全兼容香港4G制式；最關鍵就係電池大幅加碼至3,200mAh，電量唔使慳住用，睇片、上網都Enjoy啲！