《Pikmin 3》體感操控小星人大出擊

好多機齡較長的機迷成日話「以前遊戲好玩啲」，全因近年遊戲設計公式化，太過着重畫面而忽略咗趣味。這隻睽違了九年的任天堂自家出品遊戲《Pikmin 3》就唔同，玩法延續當年簡單有趣的調子，靠控制一大班Pikmin囝囝清除敵人及蒐集大型水果，市面上真係搵唔到相似的遊戲。今集追加能撞穿牆的Rock Pikmin同曉飛天的Winged Pikmin，玩法變化多多；再用Wiimote搭Nunchuk又或是用GamePad玩，連操控都有新意！

（左）新品種Winged Pikmin有對翼，能有效率地蛋到高處。
（右）新品種Rock Pikmin擅長撞穿牆。

只有Winged Pikmin可以飛上天打空中敵人！

成支Pikmin小軍隊出擊，蟻多摟死象真係Worko架！

一般Pikmin會浸親，大家又諗唔諗到計點過河呢？

有塊咁堅硬的水晶牆阻隔，大家都知係時候由Rock Pikmin出場！

遊戲收錄了二人對戰Bingo模式，鬥快完成直、橫或斜任務即可獲勝。

打巨型Boss時按Z掣，就會全體出擊，不過當心Pikmin唔夠打逐一升天呀！

今年E3任天堂展區設有由主角Alph率領三隻小Pikmin的遊戲舞台畀參觀者影相，非常Kawaii！

於E3會場內亦有得試玩「Tropical Forest」及「Thirsty Desert」兩個版圖。

距上集推出已有9年

其實《Pikmin 2》已是2004年的出品，當時仲係GameCube平台，可能機齡較淺的機迷都未必聽過GameCube呢樣嘢，查實佢係Wii之前的任天堂主機，不過其產品壽命唔長。言歸正傳，本作《Pikmin 3》故事概念都同頭兩集無乜太大分別，玩家要控制主角兼引領一大班Pikmin囝囝完成各種任務，從而蒐集大型水果讓星球居民充飢，遊戲極具趣味，並非靠超眩目的畫面或CG來取悅機迷。始於Wii U跟GameCube已隔了兩個世代，畫質強化都好正常；除提升至高清畫面外，亦將《Pikmin 2》的平面畫面提升為遠景跟近景都清晰有致的立體設計，拋Pikmin囝囝出去幫手時唔怕睇錯位喇！

Rock Pikmin撞穿牆

今集可控制的主角由上代兩位增至三位，包括由Alph、Brittany以及隊長Charlie，玩家可以隨時從三位角色當中切換，分工合作解決難關。不過佢哋唔係重點，最緊要識得運用個子小小但又會成群結隊出擊的Pikmin幫手完成任務，但首先要搞清楚唔同種族的Pikmin有何擅長，紅Pikmin、黃Pikmin同藍Pikmin都係遊戲系列原有的Pikmin品種，分別能以火攻擊、可跳至高處以及在水中發揮特殊能力；到《Pikmin 3》就再增加外形似石頭的Rock Pikmin同有對護翼的Winged Pikmin。顧名思義，Rock Pikmin身軀堅硬，可以撞穿牆壁，亦能對付擁有硬殼的敵人；至於Winged Pikmin就可以避免以迂迴路線飛向高處，甚至可攜帶水溶物質飛越水面。

E3現場爭住試玩

好多年輕玩家可能都想知，到底《Pikmin 3》點樣玩？就以用Wiimote加Nunchuk操作，只要按B掣就可召集玩家目前所引領的Pikmin；而將Wiimote指向電視畫面，再按A掣的話，就可將Pikmin引領到特定位置；此外按C掣則可選擇Pikmin種類；按Z掣就會自動鎖定敵人同目標物，可以率領整支Pikmin兵團朝目標物或敵人Boss進擊，總體操控方法其實同早年好興的RTS遊戲有啲類似。遊戲要在限時內完成任務，不過有時太理想地要完美擊倒所有敵人反而會耽誤時間，所以最好都係速戰速決，收夠一定的Pikmin數目就馬上挑戰下一個難題。今年E3展覽中，任天堂就提供《Pikmin 3》的「Tropical Forest」同「Thirsty Desert」兩個版圖試玩，前一關主要試用Rock Pikmin；後一關就可操控Winged Pikmin，兩者都可以雙人合作模式進行，好多參觀者都爭住玩呢！