定期Check車可以確保汽車Keep住最好狀態，不過好多時Check車都要預早成個月落Booking，真係好難預時間。近年Volkswagen喺本地銷量增長速度飛快，去年就賣咗超過3,800輛新車，為咗應付咁龐大嘅售後服務需求，廠方最近擴充咗位於荃灣嘅服務中心，每日最多可以處理到80部汽車（未計西環及屯門嘅維修中心），大幅縮減預約輪候時間，而且大部分維修檢查服務可以即日完成，十分方便。

位於荃灣德士古道嘅服務中心，佔地多達四萬平方呎，比擴建前足足大了一倍。

接待員對每款VW型號都有相當認識，可以詳盡解答客人查詢。

去到服務中心，記得先取票輪候，由於服務櫃位增加至12個，客人平均在五分鐘內就可得到服務。

客人休息間寬敞舒適， 唔似傳統車房咁雜亂。

工場設有29台汽車汽車升降台，每日最多可處理80部車。

中心特設賽車模擬器，最啱等攞車時Kill Time之用。

零件倉備有大量存貨，常用零件一應俱全。

中心內設有精品售賣區，最受歡迎嘅產品係模型車及服飾。

VW香港客戶服務中心維修服務經理林銘熙表示，擴充服務中心後，可大幅縮減預約輪候時間。

VW位於荃灣嘅服務中心已經完成擴充，唔只環境寬敞舒適，有餅、茶、咖啡和雪糕提供，仲有賽車模擬遊戲及精品售賣區，擺脫車房過往畀人雜亂無章嘅印象，甚至喺度Hea吓、同其他車主傾吓車經都一樣合適。VW香港客戶服務中心維修服務經理林銘熙表示，中心嘅服務櫃位增至12個，客人嚟到稍等一陣，平均五分鐘內就埋到櫃位。由於工場面積大咗兩倍，每日可處理多達80部車，預約整車時間比擴充前縮減咗2/3，一般嚟講，客人朝早嚟Check車，除非有特別要求，基本上都可即日攞返部車，期間仲可享用廠方提供嘅免費穿梭服務，來往服務中心及青衣機鐵站。

五分鐘埋位查詢

地方大咗之餘，人力資源以及硬件配套都同步升級，汽車升降台（唧架）嘅數量就多達29台，師傅亦增加至27名，每位師傅都分配到一個升降台，大大提升工作效率。林先生表示：「每名技工及接待員都要通過培訓及考核先可以正式上班，初階技工需要接受約100小時培訓，再經過考核及一段時間嘅在職培訓，先至成為合資格技工，而且每當有新技術或新車推出，廠方都會安排員工再次參加培訓，務求令上下員工對VW嘅每款型號都瞭如指掌。」加上中心零件倉備有大量存貨，常用零件一應俱全，萬一遇上冷門零件啱啱缺貨，亦會立即安排空運到港，盡可能幫客人慳番時間。林再補充說：「除此之外，中心仲會繼續增設各式各樣嘅原廠工具，務求令舊款車嚟到，都有相應工具處理，況且部分技師已服務VW多年，對舊型號有深入認識，整合起嚟，無論硬件、技術及師傅經驗都不成問題。」

新器材超快速度軚

服務行業講求質素及效率，如果部車整少少嘢都要放低幾日、又整得唔好，就真係幾平都冇用。林先生認為：「中心最近投資約30萬添置咗部先進嘅度軚機，優點係速度快，只需5至10分鐘已經攞到數據，部車上架Check過冇問題就走得，相對於以往閒閒哋都要半日至一日先做到量度及調校，依家真係慳番唔少時間。」返原廠Check車唔只確保每項檢查都合乎原廠規格，仲可以一次過解決所有問題，維修時間都短啲，林再指出：「咪睇小偈油呢部分，好像原廠建議使用嘅偈油，香港就只得我哋有，就算坊間買到嘅都好可能係水貨，唔用原廠建議嘅偈油，有可能影響引擎表現，甚至減低引擎壽命，慳少少錢隨時得不償失。」

查詢：3698 9733（Volkswagen HK）