Beats Neon Mixr夏日螢起來
Beats耳機設計靚、顏色夠搶，一向都多潮人捧場，今個夏天仲更加有「螢」！Beats為原本DJ耳機Mixr換上五款螢光色，變身成Beats Neon Mixr，落夜場捽碟、跳舞固然搶晒眼，就算去沙灘、去船P都「螢」得起。要提係每款螢光色Mixr耳機香港只限售400隻，搶唔切的話，今個夏天就做唔到「螢」人喇！
Beats Neon Mixr 各$2,200
同樣都是Beats Mixr，但今次換上螢光色後即變成Beats Neon Mixr。
左右耳罩都設有耳機纜線連接，方便用家不同習慣及需要。
耳罩部分可作270度扭動，設計較不少DJ耳機只能單方向扭動來得方便。
廣告由法國孖仔舞蹈團體Les Twins擔綱演出。
David Guetta都有在廣告尾段登場，雙手扯開螢光喉管都好有「螢」！
附加一個白色硬淨保護盒，機面的「b」字Logo更會跟番耳機顏色。
備有螢光綠、螢光橙、螢光粉紅、螢光黃、螢光藍五色選擇，香港每款只限量推出400隻。
以節奏感強的PSY《Gentleman》試聽，背景音樂表現豐富，人聲亦無被壓低。
Beats Ekocycle有31%機面是用再生物料製造，連包裝盒（後）也是以再生環保紙製作。 $2,600
以兩枚3A電池驅動主動消噪功能，隔音效果都幾理想。
耳機臂架標明Ekocycle字樣，欲知計劃理念，可上其官網www.ekocycle.com瀏覽。
DJ巨星特別設計
去年中推出的Beats Mixr本身係由DJ界巨星David Guetta設計，佢兩年前榮獲「DJ Mag Top 100 DJs」的第一名，今年五月時更來過香港表演！由這位法國DJ大師設計的DJ耳機，自然能夠切切實實滿足DJ的需要，例如每隻耳罩都有可前後旋轉270度的轉軸關節，方便單耳監聽；而以柔軟皮革製作的耳墊固然戴得好舒服，加上耳機非常輕巧，連續戴幾個鐘都不成問題。
新增五款螢光色
去年原版推出時，只有黑、紅及白三色，比較穩打穩紮，今年就改出Neon版，一口氣加入螢光綠、螢光橙、螢光粉紅、螢光黃、螢光藍共五款顏色。產品廣告除有David Guetta親自登場外，仲搵埋同樣來自法國的孖仔舞蹈組合Les Twins在暗黑環境中戴住耳機跳，真係「螢」到震！就算唔識捽碟，跳舞又無呢對孖仔咁勁，戴住個螢光耳機襯背心、短裙夏日Look都已經好搶眼！
最啱聽節奏感強歌曲
Beats耳機其實唔止得個樣，音色表現都好正。Beats Neon Mixr用上配合特製振膜的40mm驅動單元，提供好廣闊及圓渾的低頻效果，好啱聽Pop、R&B以及Rap等節奏感強的歌曲類型。用上PSY的《Gentleman》一試，背景音樂表現豐富，每下低音都好似打到入心入肺外，人聲都無畀背景音樂喧賓奪主，雖然都只係聽得明「Mother Father Gentleman」呢句。值得一讚係耳機隔音都唔錯，聽歌時都唔使同時聽埋身邊啲人「和唱」。
Beats Ekocycle Studio膠樽造耳機
唔止Beats Mixr有更新版，連好多潮人選用、具備主動式消噪技術的Beats Studio都一樣有新款，但今次唔係玩顏色，而係從物料方面着手。新版本耳機名為Beats Ekocycle Studio，睇名都估到跟環保有關，無論係再造紙盒面包裝，到含有31%再生材料的耳機表面都貫徹環保概念。大家未必估得到，每隻Beats Ekocylce Studio耳機表面原來是用上三個再生PET膠樽製成。至於音質表現則同Beats Studio一樣，低音強而清晰，高音延伸度高，而且消噪隔音效果都做得幾好！
查詢：2262 1173
