《地球防衞軍4》

橋唔怕舊，最緊要受。前三集《地球防衞軍》都係用上第三身射擊方法，喺城市跟巨型外星昆蟲搏鬥，點知到第四集仍然用同一條橋包裝！不過好在距離第三集推出時間已有六、七年之遙，今代玩家都可能未玩過之前版本；而且今集都相應地提高咗畫面質素，加上有新防衞軍種類、新「進擊之巨蟲」以及四人協力模式，喺呢個遊戲界小淡季中，都算係值得玩的遊戲之一！

《地球防衞軍4》

城市畀巨型昆蟲侵佔，諗起都得人驚。

千祈唔好畀巨型甲殼蟲埋到身，佢哋把口好厲害，而且仲識得釋放強酸添！

唔係所有敵人都係昆蟲，如「Hectors」係兩腳步行機械人，用迫擊炮招呼佢就啱數！

巨型外星太空船雖然無乜戰鬥力，但最厲害係會放下勁多外星昆蟲兵團！

協力作戰時，見到隊友有難，要盡快上前幫手救醒佢；隊友間仲可以用文字溝通。

用導彈炸爆放大版紅火蟻真係爽！

新兵種「Fencer」配備極具防守力的防護盾，並能用上多種重型武器。

八年後外星生物重臨

《地球防衞軍》頭三集分別於03、05及06年推出，未玩過都唔奇，而且之後一直無新作發布的消息。結果等足六年幾先見第四集《地球防衞軍4》面世，如果係忠心Fans的話真係等得手指都硬晒！今集故事設定為2025年，即係第三集故事八年後，原本上集被擊退的巨型昆蟲又重回地球，當然地球防衞軍（Earth Defence Forces，簡稱EDF）又要再次出動抵禦巨大外星生物的入侵啦！情節真係「無限Loop」，要吸引玩家，自然要加入新兵種同新敵人。

新兵種Fencer攻守兼備

今集地球防衞軍主要有五種兵種編制，例如有主力陸戰部隊特戰步兵「Ranger」，可以使用超過150種武器；以外星生物技術開發出來的「Wing Diver」，是裝備着飛行翼的女性限定特殊部隊，係對付巨大外星昆蟲嘅王牌殺手。此外還有負責空爆任務及投下武裝的「Air Raider」以及負責輸送部隊的「Porters」，而今集就追加穿上同樣倚賴外星技術開發的重型護甲新兵種二刀裝甲兵「Fencer」。「Fencer」既披上防禦性極強嘅護甲及防護盾，兼裝備極重型的武器，而且「Fencer」更能使用多種攻擊力強大的武器如可超高速連發的格林機炮（Gatling Gun）、可發射射穿盔甲彈藥的手持加農炮（Hand Cannon）以及大型雷射導引飛彈等，作為新兵種嚟講都算吸引。

四人連線打巨蟲

當然，地球防衞軍戰鬥力提升的同時，外星巨型生物部隊都有備而來。巨型甲殼蟲身形都有幾個人咁大，靠強力的下顎以及強酸作為主要武器，畀佢咬到死硬；至於巨型蜘蛛雖然身形龐大，但移動速度敏捷，仲會吐出蜘蛛絲吸住地球防衞軍，令佢動彈不得，並且會迅即被吸走體力。不過唔係所有外星生物都以昆蟲外形出現，仲有一類係機械人，其中代表角色有在第三集時都已經出場，能雙手持有武器的巨型兩足步行機械人「Hectors」，到今集更會有外形相似，但穿上新裝甲及可使出防護罩的新型「Hectors」，防守力大大提升！要單人打低巨型昆蟲兵團並唔容易，因此今集追加最多四人連線的協力模式，玩法同依家好多射擊遊戲一樣，隊友有難時可以幫手救援，甚至可用上文字方式同隊友溝通，不過如果改成語音應該會方便啲！

INFO

類型：動作射擊

開發：Sandlot

平台：PS3、Xbox 360

推出日期：已推出

售價：約$400

查詢：2359 7998