今年NBA總決賽打得特別精彩，大帝LeBron James憑一己之力帶領邁亞密熱火再奪總冠軍，姑勿論閣下是否大帝Fans，都要寫個「服」字畀佢！但估唔到嘅係，LBJ休季期間竟然唔好好抖吓，開完慶功P就遠赴上海表演鋤樽絕技？非也非也，實情係Enterbay上海新店首賣嘅LeBron James 1/6 Figure，五官、輪廓甚至爆肌身形都似足大帝真人，加埋EB首度喺內地「插旗」，無怪乎咁多粉絲前嚟朝聖！

隨盒備有笑臉及O嘴兩款頭雕，還原招牌高額角之餘，連Headband都跟埋。

隨盒只有一對紅白色嘅疑似Lebron 9波鞋，期望日後會追加更多鞋款啦！

Spalding磁石籃球，對應磁石手掌，可以好穩陣咁單手拎起。

熱火衞冕成功，總冠軍獎盃自然唔少得。

心口獅子像、背脊Chosen 1等紋身都印得清清楚楚，仲統一埋膚色，觀感更自然。

包裝盒印咗簽名字樣，更添收藏價值。

1/6 RM LeBron James，素體、關節都經過改良，並且比一般12" Figure稍高。依家喺上海先賣，香港方面暫定喺本月尾嘅動漫節開售，定價$1,588。

內地勁多李小龍粉絲，EB自然要帶埋佢上上海，仲透露今年11月底會有1/6《唐山大兄》版本，龍迷要儲定錢喇！

供上海店率先發售嘅MJ公牛主場版，係Series 1嘅最後一款，以95-96年度Finals做藍本，波衫右邊印咗總決賽徽章，並且腳踏高筒紅黑AJ XI，夠神氣！香港方面暫定本月有售，售價$1,998。

首度引入平板電腦介紹系統，客人只要篤幾篤，就知道產品資料。

店內掛咗Michael Jordan簽名波衫，講明先，睇多幾眼無妨，不過非賣品是也，不必多費唇舌問價。

Kobe Bryant親筆簽名Figure，僅限上海顧客抽獎，港迷冇份，有啲偏心喎！

Bill爺話除咗上海門市，仲計劃喺內地開多幾間，推廣Figure文化。

嚟自湖南嘅諶明，有齊EB歷年Figure，今次仲帶埋自製嘅Dream Team 1/6波衫嚟上海朝聖︰「其實內地有不少Figure玩家，Entebay有分店後，以後就可直接到來選購，毋須託朋友來香港捱炒價了！」

新店位於上海市盧灣區茂名南路16號，鄰近藝術區，走時尚格調。

EB近年動作多多，除咗將高清人偶技術擴展至1/4範疇，新開了HD Masterpiece系列外，仲用天價攞到NBA「拉臣」出神級球星Figure，代表作Michael Jordan至今已經賣出四萬套，令平時較少接觸玩具嘅籃球迷、波鞋迷都相繼入坑。

重點大搞NBA

適逢今年係品牌成立八周年，主腦Bill爺又有新動作，就係喺上海開設內地首間門市，Bill爺認為︰「由於香港市場已經成熟，係時間放眼內地，上海係首站，預計年底北京旗艦店亦會開幕，之後陸續仲會喺成都、廣州開分店，希望將Figure文化喺內地普及開去！」老老實實，筆者都祝願Bill爺心想事成，起碼少咗內地人落嚟香港掃貨，我哋班港迷幫襯都容易啲，不過希望Bill爺唔好淨係北望神州，忽略咗我哋呢班老主顧囉！

EB上海新店位於恬靜嘅盧灣區，鄰近有畫廊、藝術館，而佔地千幾呎嘅舖面採用簡約黑白風格，每件產品都有平板電腦簡介，裏裏外外都貫徹潮店風格。Bill爺又表示，新店服務沿用香港嗰套，既有VIP會員制，同時亦有大量配件，方便顧客七日內隨時更換。另外，櫥窗格局就預示咗EB嘅日後發展，NBA球星Figure佔咗多數，Bill爺亦不諱言︰「鑑於內地有數以億計嘅籃球迷，我哋未來重點會放喺NBA上，例如MJ會有1/4 Version及情景擺設，除此之外，今年九月及十月分別會推出Blake Griffin及Derrick Rose，仲有多款球衣、球鞋日後會獨立發售，連埋籃球架，務求滿足Fans唔同需要。」

一冷一熱雙頭雕

講番今次新店開幕嘅招牌作品1/6 Lebron James，慕名而來嘅顧客甚多，可見大帝喺內地人氣超高，Bill爺指出，為咗將LBJ最傳神嘅一面移植到Figure身上，佢哋事前做咗唔少準備工夫，例如專登開發新素體，身材跟番真人比例，所以比MJ稍高，肌肉線條亦大幅強化，並且重新調整手臂及雙膝關節。另外，LBJ紋身成癮，EB就忠實將心口嘅獅子像，以及背脊嘅Chosen 1等圖案移印出嚟，仲特別統一埋膚色，兼且解決以往嘅甩油問題，令Figure玩幾耐都能夠保持原貌。

頭雕方面，試辦於一年前已經喺網上曝光，奈何出於NBA嘅修改需要，所以延至大貨派街當日先至現真身。就實物所見，由Scuderia操刀、Y.J.Park監修嘅頭雕，無論係五官輪廓、皮膚質感、眼紋鬚根甚至招牌高額角都似足真人，加埋笑臉及O嘴兩款表情，分別對應拎獎或爆籃兩款招牌甫士。服飾係另一亮點，熱火白色主場波衫用咗針線更密嘅布料車成，令球會標誌、6號字樣都有更理想嘅修邊效果，配合頭箍、護腕、Legging、波鞋、Spalding磁石籃球、總冠軍獎盃及五對造型手掌，齋係配件已經有排玩。

查詢︰2332 3615（Enterbay）