暑假又到!宅男們為追捧日本動漫偶像,若然只豪使購買動漫精品、偶像DVD,甚至是人物攬枕回家「供奉」,倒不如儲起彈藥趁假期遠征日本東京「朝聖」!心動不如實際行動,筆者就推介5個東京7月必訪節目,例如能一嘗動漫偶像冒險嘅「台場合眾國2013」、搶先欣賞新款玩具嘅「秋葉原Tamashii Features」、(目及)盡和服美眉嘅「隅田川花火大會」等,有Show睇有嘢玩,好過留喺香港隔空「幻想」啦!

1.動漫冒險 台場合眾國

位於台場嘅富士電視台,每年暑假都會舉辦大型綜合節目「台場合眾國」,今年由7月13日至9月1日,電視台會以旗下嘅綜藝節目、電視劇、歌手、動漫卡通等包裝成大型冒險樂園,例如之前有《One Piece》等身大黃金梅利號、遊戲節目《VS嵐》等,今屆更搵嚟AKB48擔任宣傳大使,聽聞會場更會搭建專屬舞台,難得一見!

2.遊園氣氛 上野夏日祭

7月13日至8月11日在上野公園舉行嘅「上野夏日祭」,是東京其中一個著名祭典,於不忍池會有賞荷、放水燈及冰雕展活動,圍繞池畔亦有攤檔市集,而水上音樂堂就有音樂會及藝能表演。到咗7月21日正日更有巡遊環節,日本美眉們都會盛裝應節,龍友記得帶定架生「打女」喇!

3.朝拜高達 Gundam Front Tokyo

同樣位於台場,JR站附近嘅Gundam Front Tokyo,除咗門口有隻1:1高達企定定畀粉絲「朝聖」外,展館仲預備咗大量歷代高達作品畀你欣賞。更會不定期舉辦專題展,最近就有插畫師安彥良和嘅畫展,展出大量高達動畫分鏡插圖、漫畫連載草圖、油彩畫集等,睇完仲可以去附近嘅Gundam Cafe歎番杯「哈囉咖啡」。

4.搶先觀摩 秋葉原玩具預展

於7月13及14日,喺秋葉原Belle Salle Akihabara將會有Bandai收藏品玩具品牌「Tamashii Nations」嘅新玩具預展,現場將介紹大量「拉打」(幪面超人)及戰隊角色Figure,免費入場。會場亦設有限定品攤位,可購買拉打Figure連UV燈展示台套裝,特攝迷肯定鍾意。

5.浴衣美眉 花火大會

隅田川的花火大會是日本其中一個傳統煙火盛會,每年都定於7月最後一個星期六(今年是7月27日)舉行,共分兩個會場進行;第一個是櫻橋下游至言間橋上游,另一個就於駒形橋下游至廄橋上游進行,當晚會發放璀璨煙花。最佳欣賞位置首推JR淺草站附近,大家更有機會見到日本美眉穿着傳統浴衣,情節似十足日劇橋段,要睇就早啲霸位喇!

達人教路:AKB劇場公演 改制用電郵抽飛

「AKB48成立時嘅專屬大本營,位於東京都千代田區外神田『堂吉訶德秋葉原』8/F,幾乎每日都有AKB各Team的定期演出,於劇場舞台近距離同粉絲獻藝。以前可以先去官網睇定Schedule,做咗會員再抽籤購買門票。但依家改咗制度,海外粉絲只能夠透過官網指定電郵,預早一個月電郵講低到訪日本日期,以及想欣賞嘅公演單位,等官方抽籤決定,一旦成功便會以電郵通知你,不過競爭較激烈。反而最近有旅行社搞咗個大阪團,$8,000起包睇NMB48劇場公演,希望遲啲連東京AKB都搞到啦!」