筆者童年時父母管教甚嚴，要連續十次默書100分，先得一蚊雞做獎賞，仲要轉頭藉詞「儲起佢」而沒收，所以買玩具此行為喺筆者童年係唔存在嘅！諗番起細個最瘋狂睇嘅卡通片，就係呢套《魔神英雄傳》，當年主角飛雲嘅龍神丸等一系列模型，都係要去文具舖欣賞，從來無錢擁有過。好在Bandai舊年Robot魂系列推出咗龍王丸同邪虎丸玩具，唔使六舊水一隻，識得變形之餘，仲送埋上咗色嘅角色公仔。當時怕佢出出吓爛尾就無輕舉妄動，點知嚟緊八月同十月竟接連推出龍星丸及戰王丸！呢個時候筆者聽到一句：「飛雲！機會嚟喇！」我就無端端畀咗千二蚊買晒兩隻……
